Antía Mayo e Paula Novo estarán desde mañá coa Selección Española Sub-17

As futbolistas galegas Paula Novo (RC Deportivo ABANCA B) e Antía Mayo (Victoria FC) están nun momento doce. Non hai moitos días que estaban coa Irmandiña en Arteixo, ás ordes de Quin Valbuena, defendendo as cores de Galicia. Desde mañá, estarán en Los Ángeles de San Rafael (Segovia) ás ordes do seleccionador estatal Sub-17, Kenio Gonzalo, para unha concentración coa Selección Española desa idade.

Tal e como explica a Real Federación Galega de Fútbol (RFGF) a defensa Paula Novo (RC Deportivo Abanca B) e Antía Mayo (Victoria FC) veñen de ser convocadas pola Selección Española Sub-17 para participar nunha concentración. No caso da xogadora do Victoria FC, Antía Mayo, a súa chamada chegou nunha segunda quenda para substituir a baixa de Naiara Ordás (CDE Racing Femenino). 

Así, dúas das nosas estarán coa Selección Española Sub-17 logo de ser citadas polo seleccionador, Kenio Gonzalo. Desde mañá, luns 18, estarán participando nunha concentración que durará ata o 20 de abril. Será en na localidade de Los Ángeles de San Rafael (Segovia).

Unha vez obtida a clasificación para a fase final do Campionato de Europa da categoría, a Selección Española Sub-17 feminina volverá concentrarse con 24 xogadoras formando parte destas xornadas de traballo, entre elas figuran as dúas futbolistas galegas.

Antía Mayo e Paula Novo, futbolistas da Irmandiña Sub-17 de Quin Valbuena

Ambas as dúas xogadoras son parte da Selección Galega Sub-17. Non hai que esquecer que Galicia acaba de se clasificar tanto na categoría Sub-15 como na Sub-17 como primeira de grupo e competirá no Grupo Ouro na segunda fase polo título estatal o próximo mes de xuño.

Desde a RFGF felicitaron publicamente “a Paula e a Antía por esta convocatoria coa Selección Española”.

💙🔜🇪🇸

📋 As galegas Paula Novo (@RCDeportivo Abanca) e Antía Mayo (@victoriafcfem) veñen de ser convocadas pola @SeFutbolFem sub 17 para participar nunha concentración en Segovia

🔝 Ambas disputaron recentemente a primeira fase do Campionato de España coa Selección Galega

— RFGF (@futgal) April 15, 2022

Esta é a convocatoria de 24 futbolistas na que están as dúas galegas Antía Mayo e Paula Novo