Xusto na linde do final da primeira volta, o Cidade de As Burgas moveu os marcos e deulle estrea o seu casilleiro de triunfos. O conxunto que adestra Manolo Codeso impúxose por un claro 6-2 ao CD Leganés FS.
Houbo que agardar ao oitavo partido disputado, que en realidade correspondía á segunda xornada de Liga da Primeira División, para que as ourensás do Cidade asinasen o seu primeiro partido gañado. O traballo das galegas rematou por fin en dar froitos en forma dun resultado positivo.
Aos sete minutos de partido a gardameta local, Ana Lastra, anotaba o primeiro tanto do partido batindo á cancerbeira visitante desde o borde da área (1-0). Sería o primeiro dos dous tantos que anotaría na tarde. O segundo tanto local foi obra de Sol Pedrera que tamén anotou a pares os tantos diante do CD Leganés (2-0).
Antes do descanso un erro de Lucía Nespereira nun despexe supuxo un gol en propia porta da futbolista verdibranca (2-1).
Á volta do descanso, con catro minutos de xogo, Clara marcaba o 3-1 para o Cidade de As Burgas. O segundo de Sol Pedrera veu dun disparo de 10 metros froito de que as visitantes alcanzaron a quinta falta e supuxo o 4-1.
O Cidade de As Burgas perdou por dobre cartón amarelo a un dos seus baluartes, Lucía Nespereira, pero tirou de concentración e de oficio aguantando ben os envites das pepineras.
Neses minutos de inferioridade tiveron a súa mellor ocasión para facerse co encontro as futbolistas do Leganés, pero non foron quen. A concentración e o traballo das locais anulou a súa capacidade de manexar o partido.
Dous goles do Lega, e os dous en propia porta
Con todo, recurtou levemente distancias o conxunto madrileño por medio de Pipi no minuto 34. O seu disparo o desviou un chisco Sonia Pacios, polo que pode considerarse en propia porta, igual ca o primeiro.
‘Vengouse’ a cancerbeira local Ana Lastra anotando o seu segundo gol da tarde e quinto do conxunto galego catro minutos despois. O seu chut de portería a portería levaba lume.
Redondeu o resultado co 6-2 case no límite do tempo Sonia Pacios e a ledicia percorreu a cancha ourensá.
As futbolistas do CD Leganés que até a disputa deste partido era cuartas sufriron por partida dobre por mor das futbolistas de Ourense. Por un lado, o Cidade de As Burgas endosáballes unha dolorosa derrota 6-2 coa que seguramente non contaban. E por outra banda, o Ourense Envialia arrebatáballes a cuarta posición na táboa clasificatoria.
As visitantes estiveron lonxe do seu nivel habitual esta xornada sobre o 40×20 e as locais, conseguiron que, por fin, o futsal que levan nas botas rematase de dar froitos en forma de goles. Concentración, sacrificio e traballo, tres ingredientes habituais nas filas verdibrancas que esta vez si tiveron premio sobre a cancha.
O CD Leganés, sempre por detrás no marcador, foi un conxunto desdebuxado e espeso. Non se rendiron pero non remataron de entrar no partido, véndose sobrepasadas continuamente polas ourensás. A ansiedade non fixo máis que agravar a situación para as madrileñas.
Labrado: “O Cidade das Burgas foi un exemplo do poder da ilusión”
O adestrador das madrileñas, Iván Labrado, admitía ao final do partido que non fora “o noso mello partido. Ímonos a casa cunha derrota moi dolorosa”.
Declaraba tamén o técnico do Leganés que o Cidade de As Burgas “deunos a todos, non só ao Leganés, se non a todos, un exemplo do bonito e agradecido que é o deporte. Do poder da ilusión. Como dícia, dende logo hoxe non foi o noso mellor partido, pero gran parte do noso demérito ten sido o seu colosal acerto e a súa total forma de competir. Tócanos apreder delas para seguir aprendendo de nós mesmos”, manifestaba o adestrador visitante.
A seguinte parada na Liga, o vindeiro ano
A competición non regresa ata a fin de semana do 17 de xaneiro. Futsi Navalcarnero, Poio Pescamar, Roldán e Ourense Envialia encabezan a clasificación. Por debaixo, o Teldeportivo pecha a táboa cun punto. Catro ten o Cidade de As Burgas, seis o Viaxes Amarelle e nove a Penya Esplugues.
FICHA TÉCNICA
CIDADE DE AS BURGAS: Ana Lastra, Nespereira, Sol Pedrera, Fara e Clara – quinteto inicial -. Tamén xogaron: Sonia Pacios, Nahir, Aroa e Canolich.
CD LEGANÉS: Luci Sánchez, Patri Blázquez, María Barcelona, Puche e Guti – quinteto inicial -. Tamén xogaron: Chuli, Paula Molano, Patry Montilla, Pipi, Yerezábal e Miriam.
GOLES: 1-0, min. 7 Ana Lastra; 2-0, min. 11: Sol Pedrera; 2-1, min. 18: Nespereira (p.p.); 3-1, min. 24: Clara; 4-1, min. 32: Sol Pedrera (d.p. 10 mts); 4-2, min. 34: Pipi (toca en Sonia Pacios p.p.); 5-2, min. 38: Ana Lastra; 6-2, min. 40: Sonia Pacios.
ÁRBITROS: Borja Darriba e Rubén Ferrero, do comité galego. Mostraron cartóns amarelos ás locais Ana Lastra e douss a Nespereira que rematou por ser excluída no minuto 26. Polas visitantes foi amonestada con cartón amarelo Guti.
INCIDENCIAS: Partido disputado no Paco Paz de Ourense, correspondente á segunda xornada de Liga da Primeira División do Fútbol Sala Feminino da RFEF.