A cuarta xornada da Liga Galega de Fútbol Gaélico deixou dous partidos ben distintos. O Estrela Vermelha goleou ao Herdeiras de Dhais en Trazo, mentres que o Auriense FG venceu ao Fillas de Breogán nun encontro axustado.
No primeiro destes duelos, o conxunto local xa comezou forte o encontro, anotando desde os primeiros compases do partido cun xogo coral, no que porén destacaban Mulaosmanovic e Aldrey.
O Herdeiras tivo unha tímida ofensiva no minuto 7, pero o seu tanto non mudou o equilibrio do partido, coa balanza inclinada a favor do Estrela Vermelha.
Fronte ao festival goleador do conxunto local, as visitantes sumaban paulatinamente, vendo cada vez máis lonxe a remontada dun partido que remataría no 30-8.
Equilibrio en Ourense
O partido que enfrountou ás ourensás do Auriense e ás coruñesas do Fillas de Breogán resultou nunha alternancia de poder. A primeira parte o marcador situábase de parte de Fillas cun resultado de 9-16 debido ó gran acerto a portaría delas.
Con todo, a segunda parte foi máis tensa xa que as locais lograron igualar o marcador pasado o ecuador do encontro. Nos últimos minutos de partido o resultado ía cambiando debido á intensidade de xogo dos dous equipos, aínda que finalmente a vitoria quedou na casa cun resultado de 27-24.
Clasificación
O Estrela Vermelha lidera a táboa con catro puntos despois dun pleno de vitorias. Coa mesma puntuación, e un partido máis xogador, está en segunda posición o Auriense FG.
O Turonia / Independente, que nesta xornada descansou, vai terceiro, mentres que Fillas de Breogán é o cuarto clasificado. A clasificación péchase co Herdeiras de Dhais, que non coñece o triunfo.