- Santiago Devesa, adestrador do Auriense Campus da Auga FG, campión da Liga Galega de fútbol gaélico destacaba tras a consecución do primeiro entorchado do club ourensá: “O compromiso, motivación, ilusión e gañas de facer as cousas ben de todo o equipo son os motivos polos que hoxe somos campioas de Liga”
O Auriense Campus a Auga FG foi quen de sumar primeira Liga ás súas vitrinas (exceptuando a competición de 2020 na que competiron varios combinados) vencendo 30-20 no campo da universidade de Ourense ao Turonia GFG , que defendía título. As ourensás alzaban así o trofeo de campioas de Liga en cancha propia.
As ourensás remataron a Liga galega feminina de fútbol gaélico cun total de 8 vitorias e 2 derrotas no global da tempada e tras lograr o título da competición regular, o seu adestrador, Santiago Devesa destacou que “podería falar tan só do partido de hoxe e dicir simplemente que gañamos porque fomos superiores, pero sería inxusto reducilo todo a iso”.
Santiago Devesa: “A vitoria de hoxe é o broche final a todo o traballo e o esforzo desde a pretemporada. A realidade é que, desde os primeiros compases da Liga ata hoxe, as xogadoras deixáronse a pel en cada adestramento e en cada partido”
“A vitoria de hoxe é o broche final a todo o traballo e o esforzo desde a pretemporada. A realidade é que, desde os primeiros compases da Liga ata hoxe, as xogadoras deixáronse a pel en cada adestramento e en cada partido”, engadiu o técnico do Auriense Campus a Auga FG.
Santiago Devesa tamén quixo destacar o “compromiso, motivación, ilusión, gañas de facer as cousas ben son os motivos polos que hoxe somos campioas de Liga. Pola miña banda, non podo estar máis orgulloso de cada unha de elas e do gran grupo que formaron”.
Santiago Devesa: “O compromiso, motivación, ilusión, gañas de facer as cousas ben son os motivos polos que hoxe somos campioas de Liga. Pola miña banda, non podo estar máis orgulloso de cada unha de elas e do gran grupo que formaron”
Auriense, Estrela Vermelha e Turonia, ao Ibérico Senior
No resto de encontros, Fillas de Breogán impuxéronse ao conxunto do Estrela Vermelha por 27-14 e Grovias gañou ás futbolistas do Independiente 26-15.
Deste xeito e aínda que queda un partido por xogar, Auriense Campus a Auga FG, Estrela Vermelha e Turonia clasificáronse para a final do campionato Ibérico Senior. Está pendente de disputa o encontro aprazado entre Turonia – Estrela Vermelha para decidir quen queda no segundo e no terceiro posto. Ademais, Fillas de Breogán acudirá ao Ibérico Shield como cuartas clasificadas.
Fillos de Breogán gaña a súa quinta Liga consecutiva
O pasado sábado, 16 de marzo, o campo Arsenio Iglesias da Coruña foi testemuña da vitoria da quinta Liga consecutiva de Fillos da Breogán na final galega masculina, disputada ante Estrela Vermelha.
Os coruñeses venceron por 44-14 e igualaron os cinco títulos ligueiros dos composteláns. O partido foi emitido en directo pola TVG e en diferido pola G2.
Tras o encontro, Carlos Seco, xogador do Fillos de Breogán, indicou que “as claves da final estiveron na gran defensa que logramos facer e nas transicións rápidas en ataque coas que logramos anotar 10 goles no partido”.
Tamén quixo dar “os parabéns a Estrela Vermelha por chegar á final e pola gran tempada, así como a todos os equipos polo seu gran labor e esforzo durante todo o ano”.
Pendente de xogar queda o terceiro e cuarto posto entre Keltoi e Auriense Campus da Auga FG, que disputarase o vindeiro 6 abril en Vigo, coincidindo co torneo Reconquista que organizan os olívicos.
Próximas citas de clubs no fútbol gaélico galego
- Copa galega (masculino e feminino): 13 abril en Boiro.
- Final Liga Shield (masculino): 20 abril, sede por decidir.
- Final ibérica Senior e Shield (masculino e feminino): 18 maio Salou.
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal lle garante de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da AGFG intégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
