- Boqueixón, Esquíos F.G., IES Xelmírez I, Keltoi Montecastelo e O Resío Turonia xogarán este torneo preparatorio no CPI Antonio Orza Couto.
- Esta cita deportiva inclúese no proxecto ‘Gaélico Escolas PuntoGal’ que busca a divulgación e formación desta modalidade entre os nenos e nenas.
Este sábado, 23 de marzo, o Campo Municipal O Forte, no concello coruñés de Boqueixón, acollerá o Pre – Féile de fútbol gaélico. Tres das catro provincias galegas terán representación neste clasificatorio. Nesta competición, que organiza a Asociación Galega de Fútbol Gaélico (AGFG), farán parte os equipos: Boqueixón (Boqueixón – A Coruña), Esquíos F.G. (Toén – Ourense), IES Xelmírez I (Compostela – A Coruña), Keltoi Montecastelo (Vigo – Pontevedra) e O Resío Turonia (Vigo / Gondomar – Pontevedra).
Estes cinco equipos chegados as provincias da Coruña, Ourense e Pontevedra poderán gozar dunha xornada previa e de rodaxe para o European Féile de fútbol gaélico de categoría infantil e cadete. Esa última competición vai ter lugar en Vigo no mes de abril, segundo informa a AGFG.
É .
Xa temos aquí o torneo preparatorio para o European Feile. 5 escolas que naceron do proxecto #gaelicoescolas de @punto_gal daranse cita o vindeiro sábado 23 en Boqueixón.@futgal @officialgaa @GaelicGamesEuro @GAAworldgames pic.twitter.com/ELZJWLbJAr— Gaélico Galego (@GaelicoGalego) March 14, 2024
Este clasificatorio Pre – Féile de fútbol gaélico comezará ás 9:30 horas e finalizará ás 14:00 horas, cun total de 12 partidos de 18 minutos, con dúas partes de 9 minutos cada unha e 2 minutos de descanso.
Os partidos xogaranse formato liga todos contra todos, nunha fase de grupos na que a vitoria valerá tres puntos, o empate 1 punto e a derrota 0. Esta fase de grupos comezará ás 9:30 horas e terminará sobre ás 13:00 horas.
Unha vez rematada a fase de liga terán lugar os cruces posteriores que dependerán da clasificación de cada equipo. Nesta etapa competitiva xogarase unha final e un partido polo terceiro e cuarto posto.
Unha vez rematada a final será hora da entrega de premios e, o terceiro tempo, que está previsto de se realice nas instalacións anexas ao campo de fútbol.
Dado que estamos ante unha cita de deporte base, esta parte de convivencia con xogadores e xogadoras, que veñen de diferentes provincias, cobra unha especial relevancia. A competición, sendo importante, pasa a un segundo plano nestas idades nas que é importante compartir xogos, vivencias e a práctica deportiva con outras persoas. Esa promoción de valores está no xérmolo do proxecto ‘Gaélico Escolas PuntoGal‘.
Preparatorio para o European Féile 2024
Galicia será a sede para a disputa da III edición do European Féile de fútbol gaélico, logo das levadas a cabo en Vannes (2022) e Berlín (2023). O escenario escollido para o desenvolvemento o torneo deste ano foi o Colexio Montecastelo de Vigo, até onde se desprazarán numerosos combinados europeos. Xa confirmada a presenza de formacións de Basilea, Bélxica e Luxemburgo.
| TORNEO DE 5 EQUIPOS | |
| Boqueixón | Keltoi Montecastelo |
| Esquíos F.G. | O Resío Turonia |
| IES Xelmírez I | |
| HORARIOS E PARTIDOS | |
| Horarios | Partidos |
| 9:30 – 9:50 | Boqueixón – IES Xelmírez I |
| 9:50 – 10:10 | Esquíos F.G. – Keltoi Montecastelo |
| 10:10 – 10:30 | Boqueixón – O Resío Turonia |
| 10:30 – 10:50 | IES Xelmírez I – Esquíos F.G. |
| 10:50 – 11:10 | Keltoi Montecastelo – O Resío Turonia |
| 11:10 – 11:30 | Boqueixón – Esquíos F.G. |
| 11:30 – 11:50 | IES Xelmírez I – Keltoi Montecastelo |
| 11:50 – 12:10 | Esquíos F.G. – O Resío Turonia |
| 12:10 – 12:30 | Boqueixón – Keltoi Montecastelo |
| 12:30 – 12:50 | IES Xelmírez I – O Resío Turonia |
| 12:50 – 13:10 | 3º / 4º Posto |
| 13:10 – 13:30 | FINAL |
| ENTREGA DE PREMIOS E TERCEIRO TEMPO | |
Gaélico Escolas PuntoGal
O torneo Pre – Féile intégrase no proxecto ‘Gaélico Escolas PuntoGal‘ que nace á procura de formación e divulgación desta modalidade deportiva entre a rapazada.
Conscientes da importancia que isto ten na continuidade e supervivencia de calquera modalidade deportiva, o obxectivo principal deste proxecto que patrocina PuntoGal é fomentar a práctica do fútbol gaélico entre as nenas e nenos que se atopan en idade escolar, promovendo os valores que leva intrínsecos este deporte e formando futuros xogadores e xogadoras.
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal lle garante de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da AGFG intégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
