As Guerreiras Laranxas inician a súa pretemporada con vitoria ante o Viaxes Amarelle FSF co que terán en enfrontarse en liga logo de que as herculinas recuperaran o seu lugar na elite do futsalfem estatal. O triunfo do Pescados Rubén Burela foi por un marcador de 2-0. Pese a perder, o conxunto coruñés foi quen de deixar boas sensacións neste primeiro partido de pretempada.
A primeira parte do encontro empezou con intensidade por parte das locais, que se adiantaron no minuto 4 por mediación de Antía Pérez, cun disparo que desvía a defensa do Viaxes Amarelle Clàudia Lobo tratando de despexar e que acabou sendo un gol en propia porta subindo o 1-0 ao electrónico de Vista Alegre.
As coruñesas trataban de sorprender con algunha xogada a balón parado e tamén con transicións rápidas, pero a igualada non chegaba. As xogadoras da Mariña tiñan a posesión do esférico e xeraban moito perigo. Destacou aquí a actuación da meta Leti Rojo na portaría herculina.
As Guerreiras Laranxas tiveron máis ocasións para poñerse por diante, cunha dobre oportunidade de Masha que rexeitou Leti Rojo. O Viaxes Amarelle combinaba ben e estaba ben colocado. Aínda así, Emilly Marcondes tivo un disparo que puido ser o 2-0, pero non foi tal. Pasaban os minutos e o partido chegaba ao descanso coa ventaxa mínima pero suficiente das locais do Pescados Rubén Burela FS.
A segunda parte transcorreu co mesmo guión, as guerreiras buscando aumentar a súa vantaxe pero atopábanse cun Viaxes Amarelle FSF moi ben plantado en defensa e non había a suficiente precisión.
O conxunto coruñés tivo dificultades para facer circular o balón e xerar perigo. Un bo traballo en defensa das herculinas (hoxe vestidas de azul) fixo que o conxunto que adestra Jorge Basanta mantivese esa distancia mínima no marcador electrónico neste amigable entre equipos galegos.
As ocasións máis claras foron un disparo de Emilly Marcondes e unha vaselina de Peque despois dunha xogada colectiva, ambas as rexeitadas pola meta rival, Leti Rojo, de forma providencial.
Ía acabar o encontro co Burela aumentando a súa vantaxe nos dous minutos finais con gol de Jenny logo dun saque desde o curruncho. O Viaxes Amarelle FSF buscando as súas opcións de remontar como fose, tirou de xogo de cinco arriscando á procura de recurtar distancias no marcador, pero a fortuna non estivo do lado das coruñesas que desperdiciaron aglunha boa ocasión para achegarse e mover ese 2-0 que, finalmente, sería o resultado definitivo deste amigable de pretempada entre lucenses e coruñesas. Dous equipos que o presente curso militarán na Primeira División do futsalfem da RFEF.
Foi un bo partido do conxunto coruñés que adestra Jorge Basanta fronte a un rival como o Burela que aspira a todo e demostrou con claridade o seu nivel. As herculinas mantiveron opcións ata o último momento pero o bloque das lucenses era superior sobre o papel e foino tamén na cancha.
FICHA TÉCNICA:
2) PESCADOS RUBÉN BURELA: Jozi, Jenny, Masha, Patricia e Peque – quinteto inicial -. Tamén xogaron: Dany Domingos, Caridad García (p.s.), Antía, Emilly Marcondes e Evelina.
0) VIAXES AMARELLE FSF: María Gómez, Daryna Tkachenko, Èlia Gullí, Leti Rojo e Lau Doce – quinteto inicial -. Tamén xogaron: Clàudia Lobo, Marta Hermo, Carla, Ana Bermúdez, Laura Rivas, Cris Lourés, Carlita, Nerea Ramallo, Estela Cantero e Carol Agulla.
GOLES: 1-0 Min. 8 Clàudia Lobo (propia porta); 2-0 Min. 36 Jenny.
EQUIPO ARBITRAL: Álvaro Darriba Rivas e Adrián García López do Comité Técnico de Árbitros da Mariña. Mesa: Jorge Goyos López do Comité Técnico de Árbitros de A Mariña. Amosaron cartón amarelo a: Jozi e Peque nas filas do Pescados Rubén Burela FS, e a Lau Doce por parte do Viaxes Amarelle FSF.
INCIDENCIAS: Partido amigable disputado no pavillón Vista Alegre de Burela.
