Saboreaba o HC Deportivo Liceo o empate e o punto que lle otorgaría o 2-2 que campeaba no electrónico na súa visita ao Martinelia CP Manlleu, cando o colexiado do partido asubiou un penalti a seis segundos do final. Joana Comas materializou a ocasión a bóla queda e o partido pasou a 3-2 sen tempo de reacción para as galegas, aínda que Stanis García sacaba á cancha á quinta xogadora de pista nos segundos finais buscando o empate desesperadamente.
Era o segundo partido das liceístas co Martinelia CP Manlleu en menos de 7 días. O sábado foron o seu rival no debut das herculinas como primeiras galegas en disputar a WSE Champions League Feminina. Aquel partido rematou cun 1-3 pese á cantidade de ocasións creadas polo HC Deportivo Liceo. Joana Comas tamén marcou nese encontro. Desta volta o partido volvía caer do lado catalán pero sobre a bucina.
Abría o marcador o Martinelia CP Manlleu por medio de Nara López. Empatou a xogadora coruñesa María Sanjurjo (1-1). Con ese resultado se puxo rumbo a vestiarios.
Tras o descanso volvía a poñerse por diante Martinelia CP Manlleu. Esta vez marcaba Ona Castellví (2-2). Cris Diz foi a que devolveu as táboas ao electrónico en Manlleu. E a seis segundos do final Miguel Lapedriza sinalou a pena máxima que transformou en gol Joana Comas dando o triunfo ás locais na Ok Liga Ibedrola.
A xogada foi un contragolpe do CP Manlleu en resposta a outro previo do Liceo (o partido estaba en modo correrúas). A pena máxima sancionaba unha acción da capitá liceísta e autora dun dos goles galegos, María Sanjurjo, sobre Anna Bullò. Un minuto antes a propia Joana Comas non fora quen de bater a Carretta ao disparo dunha falta.
A derrota co CP Manlleu complica a Copa ao Liceo
O resultado complica a clasificación do HC Deportivo Liceo cara á Copa da Raíña. As liceístas que adestra Stanis García son agora mesmo oitavas clasificadas. Empatan a 16 puntos co CP Voltregá Stern Motor (sétimo). O posto noveno está só dous puntos por debaixo ocupado polo Lidergrip CH Mataró.
O partido do sábado, no que as galegas do HC Deportivo Liceo reciben ao Orkla Bigues i Riells (20:00 horas) será decisivo para que o conxunto verdibranco certifique a súa clasificación para o torneo do KO. As liceístas dependen delas mesmas e xogan coas sextas clasificadas que teñen un punto máis ca elas. Pola súa parte o CP Voltregá Stern Motor visita ao Igualada Feminí Grupo Guzmán, 12º con nove puntos.
FICHA TÉCNICA
3) MARTINELIA CP MANLLEU: Abril Alonso, Joana Comas, Ona Castellvi, Elisabet Gurri (C), Anna Bullò – quinteto inicial -. Tamén xogaron: Nara López, Julia Canal e Mireia Codinach.
2) HC DEPORTIVO LICEO: Vicky Caretta, Bea Gaete, María Sanjurjo (C), Alba Garrote e Lara Yáñez – quinteto inicial -. Tamén xogaron: Marlena Rubio e Cris Diz.
GOLES: 0-1 Nara López. 1-1: María Sanjurjo. 2-1: Ona Castellví. 2-2: Cris Diz. 3-2: Joana Comas (penalti).
EQUIPO ARBITRAL: Miguel Lapedriza Ferragut. Auxiliar: Roger Nadal Botet. Cronometrador: Francesc Xavier Taña Codinachs.
INCIDENCIAS: Partido da 12ª xornada da Ok Liga Iberdrola disputado no Pavelló Municipal de Manlleu.
