As xogadoras da Selección que fixeron historia levantando o primeiro título continental tiveron unha divertida idea para poñer a proba a súa destreza e calidade técnica nestes días de confinamento. Non é nada fácil. Ti serías capaz de facelo?
Deste xeito o combinado nacional absoluto de futsal feminino retaba á xente a través das redes sociais cun novo desafío, o #SinPapelChallenge.
As internacionais que escribiron con letras de ouro o nome de España no fútbol sala feminino quixeron dar un paso máis aló no xa famoso reto dos dez toques co papel hixiénico. Para darlle emoción, as xogadoras mudaron o rolo de celulosa por elementos moito máis orixinais que calquera de nós podemos atopar a man nos nosos domicilios.
Galegas con moito talento
As mellores xogadoras do páis volveron a demostrar a súa pericia cos pés. A galega e recén nomeada mellor porteira do mundo, Silvia Aguete do Poio Pescamar tirou dunha fruta para amosar todo o seu talento, unha laranxa. Cor da camiseta do equipo da herculina Luci Gómez, que milita nas filas do Pescados Rubén Burela e sacou a relucir toda a súa maxia dando toques cunha zapatilla de deportes.
A ourensá Vane Sotelo, que xoga no Alcorcón, deslumbrou orixinalidade e deu os toques cun peluche. Imaxinación que tamén lle botou Peque, nada en Madrid pero galega adoptiva. Compañeira de equipo de Luci Gómez e peza fundamental no Pescados Rubén Burela. A actual cuarta mellor xogadora do mundo e 7 do Burela fixo o propio cun estropallo.
Unha peza de quebracabezas, unha bolsa de cápsulas de café, un par de medias, unha bola de la, un coxín, unha pelota de tenis de mesa, un par de sudaderas enroladas, unha zapatilla, un volante de bádminton ou unha alcachofa foron os demais elementos que usaron as internacionais.
Enxeño, orixinalidade e calidade non faltan nesta Selección Nacional de futsal e de seguro que moita xente animarase a emular ás nosas internacionais. E ti, sería capaz de facer o #SinPapelChallenge.
