Con só 19 anos, a ourensá Raquel Carrera é a española escollida nunha mellor posición do draft da WNBA. A canteirana do Celta Zorka Recalvi foi elixida polo Atlanta Dream no posto número 15, na segunda ronda.
Porén, estar drafteada non lle asegura a Carrera o seu estreo na competición estadounidense. Seguindo a normativa da liga, cada equipo pode ter como máximo 12 xogadoras, quedando en 144 o total de baloncestitas que poderán competir finalmente.
Ao draft preséntanse unhas 50 xogadoras da NCAA e outras 10 de ligas estranxeiras, polo que desas 60, só 36 foron escollidas e delas cabe a posibilidade de que nin as 12 primeiras cheguen a competir.
Noche histórica en la @WNBA @raquelcarrera_ ha sido elegida por Atlanta Dream en el pick 15.
¡La posición más alta de la historia conseguida por una jugadora española! #WNBADraft pic.twitter.com/gZj6z064T3
— NBA Spain (@NBAspain) April 16, 2021
Tamén foi drafteada a catalá Aina Ayuso, elixida no pick 34 polo Los Angeles Sparks. A base do Casademont Zaragoza coincidiu con Carrera na concentración da Selección Española en Valencia.
Con este draft, as dúas españolas convértense na novena e décima baloncestista de España en ser drafteadas por unha franquicia norteamericana. En total, 15 xogadoras españolas puideron debutar na WNBA.
Os pasos de Raquel Carrera
A traxectoria da ourensá Raquel Carrera comezou da man das celestes do Celta Zorka Recalvi. A pivot chegou a Vigo con 13 anos e con 16 participou na fase de ascenso a LF Endesa.
Entón, o Valencia Basket fixouse nela e fichouna cedéndoa durante un ano ao Araski, para recuperala na presente tempada 2020/2021. Este curso, Carrera demostrou ser unha gran aposta das taronjas, cunha actuación moi boa durante a competición regular, pero destacando especialmente na final da Euro Cup. Os seus dous tiros libres no segundo final déronlle ás taronjas o seu primeiro título europeo. O resto será historia.
A galega Raquel Carrera, clave na vitoria do Valencia como campión da Euro Cup
Blanca Millán queda fóra da WNBA
Outra galega que optaba a entrar neste draft era a amiense Blanca Millán. Xogadora das Black Bears de Maine ata a fin da presente tempada, a galega fixo números emocionantes no seu regreso ás pistas tras unha lesión.
Con múltiples recoñecementos tanto individuais como co seu equipo, Millán tiña opcións de continuar progresando na súa carreira no país que a viu crecer nos últimos cinco anos. Porén, o próximo destino para a que segue sendo unha das perlas do baloncesto galego semella estar máis preto de casa.
