O Valencia Basket ten xa o seu primeir o título da historia, obtido na final da Euro Cup ante o Reyer Venezia. Nel, a galega Raquel Carrera foi determinante nos intres finais para darlle a vitoria ás taronjas, que alzaron así o título de campioas de Europa.
A xovencísima xogadora de 19 anos foi quen de deixar a un lado os nervios no momento máis importante do partido. O marcador daba a vitoria momentánea ás italianas, por un axustadísimo 81-80, no momento no que, a un segundo do pitido final, unha falta das locais da dous tiros libres ao Valencia. Entón, Raquel Carrera tomou o balón para facer fronte ao aro. Un, dous dentro, e o título quedou para as taronjas.
🍊 @VALENCIABASKET ARE THE NEW #EuroCupWomen CHAMPS IN AN UNBELIEVABLE FINALE! pic.twitter.com/Dn2lmzJoVY
— EuroCup Women (@EuroCupWomen) April 11, 2021
Raquel Carrera, unha xa non tan promesa do baloncesto
Malia a súa xuventude, a galega Raquel Carrera sitúase xa, non como unha promesa do baloncesto, senón como unha xogadora establecida no máximo nivel estatal e mesmo internacional. Nesta final ante o Venezia, a baloncestista foi autora de 13 puntos en 32 minutos sobre a pista, sobresaíndo desde o tiro libre. Ademais de dar a vitoria, a 14 laranxa tivo ao longo do duelo un porcentaxe de acerto do 83,3% desde esta liña.
En total, ao longo desta Euro Cup, Carrera sumou 48 puntos para o Valencia en 145 minutos disputados, con 75 puntos de créditos valorativos. Tamén destacou nos rebotes, sumando 24 ao longo da competición.
A ourensá está arrasando na súa primeira tempada coa camiseta laranxa e na LF Endesa tamén é unha peza clave do conxunto valencián. A falta de finalizar a fase de loita polo título, que a enfrontará co Durán Maquinaria Ensino, Carrera fixo grandes números na liga regular.
En 28 partidos desta competición, a 14 disputou unha media de 20:42 minutos, nos que tivo unha porcentaxe de acerto do 77,8% desde o tiro libre e dun 44,1% nos tiros de campo. De media, logrou uns 3,3 rebotes por partido e unha valoración do 8,8.
A ourensá tivo a oportunidade tamén de disputar a Copa da Raíña, onde participou en tres partidos, anotando un total de 22 puntos, dez deles de dous e dous desde o tiro libre, ademais de facer seis rebotes para o seu equipo. A valoración coa que finalizou a competición copeira foi de 16 puntos.
Nos play offs só leva disputado o partido de ida coas lucenses do Ensino, no que anotou catro puntos e fixo dous rebotes.
O Ensino plántalle cara ao Valencia Basket pero non evita a derrota (58-69)
