Os protocolos das 58 federacións realizados a partir do FISICOVID-DXTGALEGO habilitan manter o deporte federado. O secretario xeral para o Deporte, José Ramón Lete Lasa, presidiu unha nova reunión do Foro do Deporte Federado ‘Optimizando Sinerxías’ na que se abordou o decreto e a orde publicados esta semana no Diario Oficial de Galicia polos que se establecen medidas de prevención específicas como consecuencia da evolución da situación epidemiolóxica derivada do COVID-19 na Comunidade Autónoma de Galicia.
Lete Lasa destacou a importancia dos 58 protocolos das federacións deportivas galegas, realizados ao abeiro do FISICOVID-DXTGALEGO polo que se establecen as medidas para facer fronte á crise sanitaria ocasionada pola pandemia de coronavirus COVID-19 no ámbito do deporte federado de Galicia.
Segundo asegura o secretario xeral para o Deporte, José Ramón Lete Lasa, grazas a “profesionalidade, seriedade e responsabilidade” coa que se realizaron estes protocolos, o deporte autonómico federado volve estar exceptuado das novas restricións polo que concluíu que “cumprindo todas as medidas de seguridade e hixiene, o deporte galego é deporte seguro”. Explicaba en referencia aos protocolos realizados a raíz do protocolo FISICOVID – DXT GALEGO.
Pódese practicar deporte non federado?
No que respecta ao deporte non federado, José Ramón Lete Lasa informou que o decreto e a orde introducen algunhas modificacións no que respecta a actividade en instalacións deportivas e na celebración de eventos deportivos, de adestramentos e de competicións deportivas con público para os 60 municipios galegos que contan coas medidas máis restritivas.
Lete Lasa, secretario Xeral para o Deporte da Xunta de Galicia: “A práctica da actividade física e deportiva non federada, ao aire libre, poderá realizarse de forma individual ou colectiva, sen contacto físico, sempre que, neste último caso, todas as persoas do grupo sexan conviventes, sen contar, se é o caso, o monitor”.
Deste xeito, “a práctica da actividade física e deportiva non federada, ao aire libre, poderá realizarse de forma individual ou colectiva, sen contacto físico, sempre que, neste último caso, todas as persoas do grupo sexan conviventes, sen contar, se é o caso, o monitor”.
Ademais, “nas instalacións e centros deportivos poderase realizar actividade deportiva de forma individual, sen contar, se é o caso, o monitor, sen contacto físico, e sempre que non se supere o cincuenta por cento da capacidade máxima permitida”.
Límites de aforo nas instalacións para acoller eventos deportivos
No que atinxe aos aforos, os eventos deportivos “poderán desenvolverse con público sempre que este permaneza sentado, que non se supere o cincuenta por cento da capacidade permitida da instalación cun límite de 30 persoas para lugares pechados e de 75 persoas se se trata de actividades ao aire libre.
Non obstante, poderase ampliar o límite indicado ata un máximo de 50 persoas para lugares pechados e 150 persoas se se trata de actividades ao aire libre, logo de autorización da Dirección Xeral de Saúde Pública, atendendo ás concretas medidas organizativas e de seguridade propostas e aos riscos de contaxio”. É ocaso do partido do Dépor ABANCA desde domingo en Riazor ante o Sevilla no que poderá haber 150 afeccionadas nas bancadas.
O secretario xeral amosou o seu convencemento de que tras este mes de maiores restricións os datos de Galicia referidos á evolución da pandemia mellorarán e, do mesmo xeito, gabou o “espírito de adaptación e de superación” amosado polo deporte galego ao longo de toda a crise sanitaria.
Que pasa co deporte entre as 23:00 e as 06:00 horas
Lete Lasa tamén lembrou aos presidentes das federacións que as actividades deportivas federadas estarían exceptuadas das limitacións de circulación nas franxas horarias entre as 23:00 e as 06:00 horas nos supostos nos que se acredite a súa necesidade.
Neste sentido, os deportistas deberán portar un certificado da correspondente federación deportiva na que acrediten as causas xustificadas sendo unicamente estas xeradas por motivos propios da práctica deportiva federada (asistencia a unha competición oficial, lugar de adestramento e pertenza a un club fora da localidade de residencia, horario de adestramento…).
Así as persoas que por motivo da súa práctica deportiva teñan que transitar pola rúa fóra do horario do chamado ‘toque de queda’ estarán cubertos diante da autoridade competente.