A administracióna autonómica galega aprobou FISICOVID – DXTGALEGO, o protocolo polo que se establecen as medidas preventivas fronte á COVID-19 no deporte federado galego. Esta normativa foi dada a coñecer por parte da Xunta de Galicia ás 58 federacións deportivas. Seguindo o disposto na resolución e tomando como referencia o protocolo aprobado cada federación elaborará o seu propio protocolo atendendo ás súas modalidades e especialidades
A Secretaría Xeral para o Deporte vén de aprobar o protocolo FISICOVID-DXTGALEGO polo que se establecen as medidas para facer fronte á crise sanitaria ocasionada pola COVID-19 no ámbito do deporte federado de Galicia e que será a norma básica de referencia neste ámbito. Tanto o protocolo como a resolución da Secretaría Xeral para o Deporte (de 15 de xuño de 2020), pódense consultar na páxina web do Deporte galego.
Neste sentido, o secretario xeral para o Deporte, José Ramón Lete Lasa, mantivo unha nova xuntanza virtual cos responsables das 58 federacións deportivas de Galicia cos que repasou as medidas de prevención no ámbito deportivo necesarias unha vez superada a fase III do Plan para a transición cara unha nova normalidade e dadas a coñecer na resolución do 12 de xuño de 2020, da Secretaría Xeral Técnica da Consellería de Sanidade (DOG de 12 de xuño).
Cada federación desenvolverá o FISIOCOVID co seu propio protocolo
Seguindo o disposto nesta resolución e tomando como referencia o protocolo FISICOVID, cada federación deportiva galega elaborará o seu propio protocolo atendendo ás súas modalidades e especialidades deportivas, e que será de obrigada observancia para o conxunto dos estamentos federativos.
O devandito protocolo de cada federación deberá ser comunicado á Secretaría Xeral para o Deporte e publicado na páxina web de cada federación.
Os protocolos federativos serán de obrigada observancia para o conxunto dos estamentos federativos e deberá publicarse na web da respectiva federación.
O protocolo FISICOVID-DXTGALEGO polo que se establecen as medidas para facer fronte á crise sanitaria ocasionada pola COVID-19 no ámbito do deporte federado de Galicia responde á ferramenta de identificación de situacións deportivas de contaxio no deporte galego, un instrumento realizado tras unha diagnose exhaustiva e de forma individualizada con cada unha das preto de 300 especialidades deportivas que se practican en Galicia.
Esta ferramenta foi realizada tendo en conta as condutas de todos os axentes humanos que participan no Deporte galego, a partir da lóxica organizativa e funcional, indagando sobre todas as potenciais fontes de contaxio vistas desde todas as perspectivas.
Conter o contaxio do COVID-19
O obxectivo primordial é limitar ao máximo posible a capacidade de transmisión do coronavirus desde o primeiro desprazamento cara a instalación, espazo de práctica ou centro deportivo, durante o feito deportivo e despois do mesmo e, por conseguinte, evitar futuros contaxios en contornas familiares, locais, profesionais, escolares ou outros.
O obxecto do protocolo aprobado pola Xunta é establecer a metodoloxía para que as federacións deportivas galegas realicen o seus propios protocolos.
No FISICOVID-DXTGALEGO inclúense cales son as medidas xerais que as federacións deben fixar para reducir o risco de contaxio da COVID-19 diferenciadas entre as medidas e desinfección de superficies e material, así como as medidas para os axentes que directa ou indirectamente participen na práctica deportiva –staff, deportistas, acompañantes, público…-.
Do mesmo xeito achégase información sobre o procedemento que cada federación debe seguir para a identificación de potenciais situacións de contaxio e medidas particulares de prevención.
Medidas de desinfección e limpeza
Segundo recolle textualmente o protoco FISICOVID-DXTGALEGO: con carácter xeral, sen prexuízo das medidas específicas establecidas pola federación deportiva ou no protocolo da instalación correspondente, respecto á limpeza e desinfección de espazos, materiais e superficies deberanse ter en conta as seguintes:
- Utilizaranse desinfectantes como dilucións de lixivia (1:50) recentemente preparada en auga a temperatura ambiente ou calquera dos desinfectantes con actividade virucida que se atopan no mercado e debidamente autorizados e rexistrados. No uso dese produto respectaranse as indicacións da etiqueta. Así mesmo, non se deben mezclar produtos diferentes.
- Tras cada limpeza, os materiais empregados e os equipamentos de protección utilizados desbotaranse de xeito seguro, e procederase posteriormente ao lavado de mans.
- Cando existan postos de traballo compartidos por máis dunha persoa do staff, estableceranse os mecanismos e procesos oportunos para garantir a hixienización destes postos.
- Procurarase que os equipamentos ou ferramentas empregados sexan persoais e intransferibles, ou que as partes en contacto directo co corpo da persoa dispoñan de elementos substituíbles. No caso daqueles equipamentos que deban ser manipulados por diferente persoal, procurarase a dispoñibilidade de materiais de protección ou o uso de forma recorrente de xeles hidroalcohólicos ou desinfectantes con carácter previo e posterior ao seu uso.
- Realizar tarefas de ventilación periódica nos espazos utilizados e, como mínimo, de forma diaria e durante o tempo necesario para permitir a renovación do aire. Na medida do posible, manter as portas abertas con cuñas e outros sistemas para evitar o contacto das persoas cos pomos, por exemplo. Durante as
actividades en recintos pechados, na medida do posible, realizar os tempos de descanso e/ou recuperación en zonas ao aire libre ou ben ventiladas. - Disporase de papeleiras pechadas e con accionamento non manual, para depositar panos e calquera outro material desbotable, que se deberán limpar de forma frecuente, e, polo menos, unha vez ao día. Así mesmo, estas papeleiras deberían contar con bolsa desbotable que se cambie alomenos unha vez ao día.
