Un trío de nivel súmase ao xa de por si fantástico bloque de futbolistas que o Poio Pescamar está artellando para este novo curso deportivo, o 2023-24. Luis López-Tulla, que continuará á fronte do banco conserveiro, terá á súa orde a xogadoras da calidade de Lara Balseiro, Karina Pelé e Ale de Paz, ademais do amplio número de renovadas que xa fixeron historia a tempada pasada.
Aspirando a todo e sen renuncian a nada. Así afrontarán, a bo seguro, no Poio Pescamar o curso 2023-24. Se a tempada previa o conxunto conserveiro asinaba a mellor tempada da historia da entidade, parecen dispostos a repetir éxitos e, por que non, melloralos nesta nova andaina.
Repite como adestrador Luis López-Tulla. Para o madrileño será a segunda tempada á fronte do banco do Poio Pescamar. Na primeira os números avalan o seu traballo no banco vermello. Sumando Liga, Copa da Raíña e Copa Galicia, o Poio Pescamar sumou 25 vitorias, 6 empates e 5 derrotas. Xogaron as galegas o seu primeiro play-off polo título caendo en semifinais. Remataron a liga regular segundas, por diante incluso do Pescados Rubén Burela. Foron as menos goleadas. Unha tempada para enmarcar que fixo historia na traxectoria da entidade de Poio.
Unha brasileira e dúas galegas como reforzos
O club xa anunciou as fichaxes de Karina Pelé, unha futbolistas brasileira que xoga como pivote e que chega do Pato Branco. Antes Karina Rodrígues Dos Santos, coñecida como Pelé o Karina Pelé, defendeu as cores do Barateiro e São José. A deportista xogou sempre no Brasil, polo que aterra na liga española da man do Poio Pescamar.
As outras dúas fichaxes son retornos, xa que ambas as dúas xogadoras xa defenderan no pasado a elástica vermella. A primeira en anunciarse foi a á galega Ale de Paz. Hai catro anos que a xogadora marchaba do Poio Pescamar. Primeiro militou no Pescados Rubén Burela, durante tres anos, e logo no ENCE Marín Futsal, no que estivo o último curso. A futbolista de Neda ten no seu palmarés dous campionatos de Europa coa Selección Española, e gañouno todo coas Guerreiras Laranxas.
Desde o Poio Pescamar contan que Ale de Paz defendeu a camiseta vermella en máis de 100 partidos de liga entre 2015 e 2019.
O último reforzo que fixo público o club conserveiro é a fichaxe de Lara Balseiro. Lembran desde a entidade que a futbolista militou no club na campaña 2011-12 cando xogaban en Segunda División. Once anos despois a de Viveiro retorna a Poio, a onde chega procedente do ENCE Marín Futsal, como Ale de Paz. Como esta última, Lara Balseiro gañouno todo co Pescados Rubén Burela no que militou anos atrás.
Nove xogadoras renovadas no Poio Pescamar
A lista de renovacións do Poio Pescamar é ampla. Unha consecuencia lóxica dos éxitos colleitados polo bloque de futbolistas o pasado curso deportivo.
Desde a entidade vermella comunicaron que seguirán as seguintes futbolistas con respecto ao curso 2022-23 nesta tempada 2023-24:
- Marta Peñalver.
- Irene
- Rocío Gómez
- Elena Aragón
- Anna Escribano
- Martita
- Sandra Buzón
- Elena González
- Laura Uña
Inicio de Liga con derbi galego
A competición de Liga compeza forte para o conxunto conserveiro visitando a cancha do Pescados Rubén Burela. Un derbi galego por todo alto que empece a rodar o balón a mediados de setembro. Os oito primeiros partidos da competición disputaranse a fin de semana do 16 e 17 de setembro.
Esta é a primeira xornada de liga na Primera División do FutSalFem da RFEF para a tempada 2023-24:
| LOCAL | VISITANTE |
|---|---|
| MRB Móstoles FSF | Rayo Majadahonda AFAR 4 FSF |
| AE Les Corts UBAE | Viaxes Amarelle FS |
| Pescados Rubén Burela FS | Poio Pescamar FS |
| FSF O Castro | Ourense Ontime |
| ENCE Marín Futsal | STV Roldán FS |
| LBTL Futsal Alcantarilla | Nueces de Ronda Atlético Torcal |
| Torreblanca Melilla CF | CDE Leganés FS Masdeporte |
| ARRIVA AD Alcorcón FSF | Atlético Navalcarnero |
A primeira volta chegará ao seu fin o 11 de novembro, quedando fixado o inicio da segunda volta para inicios de 2024, concretamente a fin de semana do 13 de xaneiro. A conclusión da fase regular do torneo está programada para a última fin de semana de maio (días 25 e 26).
