Poio e Burela volven á acción na Liga

Volve o campionato doméstico e Poio Pescamar e Pescados Rubén Burela veranse as caras no pavillón da Seca o vindeiro sábado 11 de Xaneiro ás 20:00 horas. Cabe lembrar que son os dous únicos representantes galegos que estarán presentes no sorteo de Copa da Raíña de hoxe.

O Burela (2º) ten unha distancia de oito puntos con respecto ao Poio (4º) e no antecedente da primeira volta en Vista Alegre, as laranxas gañaron por 4 – 1. Nesta ocasión as conserveiras buscarán facerse coa vitoria e meter presión por entrar no pódio da Liga. As lucenses tamén buscarán seguir coa súa boa dinámica e manter o ritmo do líder Futsi.

“Imos atopar un equipo duro, que cada vez está máis feito, cun gran traballo detrás. Sabemos que nos vai poñer as cousas moi difíciles na súa pista” adianta Julio Delgado dun rival que sucumbiu en Vista Alegre, no debut da liga, por 4-1.

Raúl Jiménez  dispoñerá do seu plantel ao completo, agás a baixa de Antía, que segue recuperándose da súa lesión de xeonllo. O técnico do Poio contará tamén con Silvia Aguete, que volveu a ser chamada pola selección española para dous amigables fronte a Portugal os días 14 e 15 deste mes en Vila Real.

Novo duelo laranxa entre España e Portugal

Para este partido internacional, o Burela contará coa presenza de Peque e Jenny Lores nas filas vermellas e de Jenny Rodrigues no combinado local, con amigables o martes 14 e o mércores 15. As tres xogadoras do Pescados Rubén deberán incorporarse ás súas respectivas concentracións o domingo.

“Hai que afrontar esta segunda volta como a primeira, a ver se somos capaces de mellorala. Estamos pendentes do próximo partido, non pensamos en nada máis. Ata o momento fomos paso a paso na liga e con moitas ilusións depositadas tamén en Copa da Raíña, así que o horizonte que se presenta neste 2020 é o mellor. Esperamos recoller os froitos en maio” confesaba o técnico do Pescados Rubén Burela, Julio Delgado, na estrea da competición regular en 2020.

Julio Delgado, adestrador do Pescados Rubén Burela: Hai que afrontar esta segunda volta como a primeira, a ver se somos capaces de mellorala. Estamos pendentes do próximo partido, non pensamos en nada máis.

Defendendo a segunda praza (40 puntos), as laranxas visitarán ao cuarto da táboa (32 puntos). “Xa o diciamos a comezos de tempada. É un equipo que se reforzou moito, custoulle un pouco encaixar todas as pezas ao principio, algo lóxico. Con todo, logo da primeira volta aí está, na zona alta da clasificación, pelexando por meterse en play off de liga e vén de eliminar ao Ourense Envialia da Copa, en oitavos” advertía o burelista.

Julio Delgado, adestrador do Pescados Rubén Burela: O Poio é un equipo que se reforzou moito, custoulle un pouco encaixar todas as pezas ao principio, algo lóxico.

“Levamos unha gran semana de traballo. As xogadoras viñeron moi ben de vacacións, coidáronse en Nadal. Temos moitas ganas de volver á liga, nun formato que promete moito esta tempada”, así de ilusionado se amosaba Julio Delgado en vésperas do regreso á Bomboneira.

Julio Delgado, adestrador do Pescados Rubén Burela:As xogadoras viñeron moi ben de vacacións, coidáronse en Nadal. Temos moitas ganas de volver á liga, nun formato que promete moito esta tempada

Bonito reecontro

O partido contará cun bonito reecontro de dúas ex xogadoras da entidade conserveira e que actualmente militan no Burela. Son Jenny Lores e Ale de Paz que defenderon a camisola vermella durante cinco e catro tempadas, respectivamente. Actualmente, dúas das máis destacadas xogadoras da máxima categoría.

Agárdase un gran ambiente na cancha do Poio

Con motivo deste gran encontro, o Poio realizará un sorteo de tres camisetas do equipo entre todas aquelas persoas que acudan ao pavillón con pezas de cor vermello. O pavillón da Seca vivirá unha gran tarde de fútbol entre dous dos equipos máis fortes da categoría.