Este sábado día 24 de xuño ás 18.00 horas continúa a final do play-off polo título de Liga en Primera Federación de Futsal Feminino, de novo co clásico dos clásicos, Pescados Rubén Burela FS – Futsi Atlético Navalcarnero. O partido terá lugar no Pavillón Municipal Vista Alegre de Burela.
Neste segundo encontro as Guerreiras Laranxas, que gañaron o primeiro partido desta final o sábado pasado no Pavillón A Estación de Navalcarnero, xóganse este segundo punto na casa, que pode levalas a ser Campioas de Liga, o cuarto título dos catro disputados esta tempada, podendo celebralo con toda a afección, a Familia Laranxa ao completo.
De vencer, este sería o último da tempada e constituiría o broche de ouro ideal para o conxunto mariñán nunha tempada na que tería gañando todo canto título xogaron. Pero para iso, hai que gañar. Non poñamos o carro antes dos bois.
Despois dun partido duro en Madrid no que o Pescados Rubén Burela FS dominou o encontro, pero con tensión e moito esforzo e sacrificio, este sábado ambos os equipos volverán ver as caras nun enfrontamento que pode ser o último desta tempada, un Futsi Atlético Navalcarnero consciente diso, viaxará a Burela para tentar conseguir ese punto que lle levaría a un terceiro partido, decisivo, o martes en Madrid.
Para a capitá do equipo, Peque, podería ser o seu último partido da tempada en Burela, e sendo o último en Vista Alegre, ve ao equipo, “sobre todo e ante todo, moi concienciado do que supón este partido, con moitas ganas de dar o 100%”.
Ver esta publicación en Instagram
Moi orgullosa do traballo feito en Navalcarnero o sábado pasado, Peque ve ao equipo rival como un equipo “que vai ao límite, que é moi competitivo e non nos vai poñer as cousas fáciles, saben que é a súa última oportunidade e van vir ao 100%. Pero confío en que nós daremos o 200%”.
Sobre o seu último partido na casa, que será este “espero que remate cun título, que é o importante. Non o estou meditando moito para non chorar, así que vou desfrutalo e cando o árbitro pite o final espero que o trofeo quede aquí e ver de laranxa unha vez máis”.
Julio Delgado plantexa a posibilidade de que o Burela peche na casa o título de Liga
Segundo o adestrador Julio Delgado, “a verdade é que acompaña o resultado do sábado en Navalcarnero, levamos a semana bastante ben de adestramentos e imos chegar coas forzas suficientes para afrontar este partido na casa coa maior ilusión e sobre todo cunha boa mentalidade. No aspecto físico os equipos están cansos, pero é máis fundamental o psicolóxicos e aí estamos bastante fortes”.
Para o “a confianza” é o punto forte do equipo laranxa, “a confianza é algo que as xogadoras necesitaban de cara ao primeiro partido, conseguímolo, e agora diante da nosa afección na nosa casa temos que rematar. Vai ser un punto moi importante, como sempre digo empezar ben o partido, con boas sensacións e se é posible pechar aquí o título de liga”.
Ver esta publicación en Instagram
O punto máis perigoso do Futsi Atlético Navalcarnero “eu creo que é a competitividade, é un equipo moi competitivo en calquera circunstancia. Como o Burela son dous equipos que loitan a máis non poder. Será un partido coma na Estación, moi sufrido, a cara de can como se adoita dicir, no cal hai que ter unha gran concentración porque nos vai a esixir moitísimo”.
Con valentía encarará este encontro, que esperemos que sexa o último, o equipo enteiro do Pescados Rubén Burela FS para levar o Título de Liga 2022-2023.
