Primeira nos 400, 800 e 1.500 metros libres. Esa é tarxeta que presenta a nadadora galega Paula Otero ao seu regreso do 53e CIG Challenge International de Genève, onde competía a pasada fin de semana como membro da Selección Española Junior de Natación. Na proba suíza, a deportista do Club Natación Arteixo completou unha participación excelente.
Na loita polo ouro que acadou nos 400 metros libres todos os seus longos estiveron entre 30 e 33 segundos. So cedeu a cabeza á irlandesa Naomi Trait nos primeiros 50 metros. Nos 100 m xa colleu o primeiro lugar e non o soltou ata levar o ouro ao peto. Xa nas eliminatorias a nadadora de Arteixo obtivera a segunda mellor marca cun tempo de 4:25.30.
Os 200 últimos metros, decisivos nos 800 metros libres
Para facerse co ouro nos 800 metros libres, Paula Otero tivo que loitar duro contra outra española, Alba Herrero, da Federación de Natación Valenciana. A galega non se puxo por diante da súa compatriota ata os 700 metros. A esa viraxe chegou Otero cun crono de 7:46.56 mentres Alba perdía impulso e so acadaba 7:46.77.
Deste xeito os últimos 200 metros foron decisivos para o triunfo da galega que foi de menos a máis. Paula Otero rematou a proba cun tempo de 8:50.90 fronte aos 8:50.94 de Herrero que foi prata e os 8:57.72 7 de Valentine Leclerq da Ligue Auvergne Rhone Alpes.
O terceiro ouro acadado por Paula Otero foi nos 1.500 metros libres nos que asinou un tempo de 17:07.21. Nesta proba foi soa en cabeza desde os 500 metros. A segunda nadadora foi Alice Bataille da Ligue PACA cun tempo de 17:24.36 e a terceira praza a obtivo Bekky Pozdner de Israel cun crono de 17:36.41. Nas series eliminatorias Otero xa asinara un tempo de 17:23.93.
Os tempos asinados nestes tres triunfos supuxeron mellor marca persoal para a deportista galega.
Récord do Challenge International de Genève
Ademais dos tres ouros sinalados, a moza foi a máis rápida na piscina suíza entre as menores de 17 anos na proba de 400 metros libres batendo cun tempo de 4:19.99 o récord da proba. Otero colleitaba deste xeito un éxito que deixa pegada na historia do CIG Challenge International de Genève.
Paula Otero nadou un total de seis probas chegando ás finais A ou B de todas elas. En concreto, ademais das probas indicadas anteriormente, nas que venceu, a galega foi sétima nos 100 libres asinando un tempo de 58.66
Competiu igualmente nas distancias e modalidades de 100 e 200 metros bolboreta, rematando no posto 10º na primeira cun tempo de 1:04.28 contabilizando a súa mellor marca persoal e no 8º na segunda cunha marca de 2:25.72, en ambos casos entre as menores de 17 anos .
A fiabilidade no global dos tempos e a súa progresión, indo de menos a máis, foron, posiblemente, os segredos de Paula Otero nesta competición. A nadadora de Arteixo é bolseira do CGTD (Centro de Tecnificación Deportiva de Pontevedra).
Resultados globais da Selección española Junior
Polo que atinxe á expedición española, a Selección Junior na que competía Paula Otero coleitou 18 medallas. O desglose fala de sete ouros, oito pratas, tres bronces, ademais de e obter dez marcas persoais e bater tres récords do trofeo en categoría júnior, segundo informa a RFEN.
Santi Veiga, responsable de Equipos Mozos do Área de Natación da RFEN, “Ginebra ten suposto para o noso equipo nacional júnior unha boa experiencia internacional, de cara á preparación do Campionato de España Open do vindeiro mes de abril, antes de subir a Sierra Nevada a próxima semana”.
