A alcaldesa do Concello da Coruña, Inés Rey, recibiu á nadadora María de Valdés, subcampioa do mundo de natación na modalidade de augas abertas.
A deportista é membro do Club de Natación Liceo da Coruña e xa fora subcampioa de Europa de 2022 na modalidade 5 quilómetros en augas abertas. Ademais, é bolseira do Concello da Coruña a través do programa de bolsas para deportistas individuais impulsadas polo consistorio co obxectivo de apoiar aos deportistas da cidade.
Inés Rey trasladoulle os parabéns en nome da cidade pola prata acadada no Mundial de Doha o pasado mes de febreiro, proclamándose subcampioa do mundo na modalidade 10 quilómetros en augas abertas.
María de Valdés clasificouse deste xeito para os Xogos Olímpicos de París 2024. “É unha honra para A Coruña que María leve a nosa cidade ao máis alto do deporte mundial” explicou Inés Rey.
