A USC será a universidade anfitrioa do Campionato Galego Universitario de Natación 2024 que se desenvolverá o vindeiro 29 de febreiro na Piscina Universitaria.
Arredor dun cento de persoas entre deportistas, persoal técnico das universidades, organización, xuíces, e cronometradores/as participan neste evento que, tal e como destacou o reitor Antonio López Díaz, evidencia o compromiso da USC coa alianza entre Universidade e Deporte. “Esta é unha alianza imprescindible, moi necesaria, e que achega moitos valores dende múltiples puntos de vista para a sociedade”, explicou o reitor.
Na presentación do Campionato, que tivo lugar no Salón de Graos do Colexio de San Xerome, tamén interviñeron José Ramón Lete Lasa, secretario xeral para o Deporte da Xunta de Galicia; Antonio Leira Piñeiro, deputado provincial de Deportes da Deputación da Coruña; Pilar Lueiro García, concelleira de Deportes de Santiago de Compostela; Juan Carlos Brión Lema, presidente da Federación Galega de Natación; e José Rioseco Díaz, presidente do Club Natación Cidade de Santiago.
“Estamos a apoiar un deporte que realmente merece a pena”, dixo José Ramón Lete Lasa, quen tamén felicitou as universidades polo seu impulso da natación, feito que fai que “o estudantado teña unha vida mellor”, afirmou. O mandatario galego lembrou a importancia da actividade física nos máis novos e sobre todo dun deporte como a natación “que exercita dous terzos de todos os nosos músculos”.
O secretario xeral lembrou a igualdade dun deporte como a natación que conta con preto de 5.250 licenzas federativas, repartidas practicamente ao 50% entre os dous sexos, pero cunha lixeira maioría de mulleres.
Pola súa parte, Antonio Leira puxo o foco na colaboración entre administracións “que fai que sexamos imparables”, subliñou, para despois destacar “o potencial enorme” que Galicia alberga nesta modalidade deportiva. Finalmente, Pilar Lueiro puxo de relevo o papel de Compostela como “cidade de acollida” para este campionato e engadiu que dende o primeiro momento tiveron claro que “Universidade e Concello teñen que ir collidos da man”.
Maioría feminina neste Campionato Universitario Galego de natación
Na competición, a maioría dos deportistas son mulleres. En concreto, daranse cita un total de 44 nadadoras e 35 nadadores. De entre o conxunto de participantes 30 proceden da USC, 22 da UDC e 27 da UVigo.
O campionato abracará dez probas da categoría absoluta feminina, outras dez da absoluta masculina, e dúas probas de remudas mixtas.
Cada Universidade pode participar como máximo con catro deportistas por proba e cada deportista, como máximo, poderá participar en dúas probas individuais, á marxe das probas de remudas nas que sexa seleccionado/a. Os xuíces serán designados pola Federación Galega de Natación.
As probas desenvolveranse entre as 11.30 e as 13.00 horas deste xoves 29 e ao remate procederase á entrega de medallas e trofeos. A USC organiza o Campionato 2024 e conta coa colaboración da Universidade da Coruña, Universidade de Vigo, Xunta de Galicia, Deputación da Coruña, Concello de Santiago de Compostela, Federación Galega de Natación e Club Deportivo Natación Cidade de Santiago. No ano 2022, a UVigo foi a institución anfitrioa, mentres que en 2023 foi a quenda da UDC.
Carla Carrón, Paula Otero ou María de Valdés, referentes da natación galega
José Ramón Lete Lasa, secretario xeral para o Deporte da Xunta de Galicia, destacaba o excelente estado de saúde da natación feminina na presentación do Campionato Universitario Galego.
Neste Campionato Universitario de Natación hai, como indicabamos previamente, maior participación feminina que masculina. Ao fío deste dato, o responsable do Deporte galego salientou o excelente estado de saúde da natación feminina galega grazas aos éxitos acadados por nadadoras como Carla Carrón, Paula Otero ou María de Valdés, que vén de acadar praza olímpica para os Xogos de París 2024, tras a súa medalla de prata no Mundial de Augas Abertas.
