Finalizado o Campionato de España Open Absoluto e Junior en Torremolinos unha galega, Paula Otero, está entre os cinco únicos nadadores de toda España que conseguiron mínima para poder participar no Campionato do Mundo Absoluto.
Dentro deste minoritario grupo, no que se atopan nadadores xa consagrados como Jessica Vall e Joanlluis Pons, están Ángela Martínez, Carles Garach e a nosa nadadora do C. N. Arteixo.
Paula Otero, tras facer un espectacular campionato conseguindo oito medallas e mellores marcas persoais, facía á mínima en 800 libres para o Campionato de Europa e Campionato do Mundo Absoluto.
A coruñesa colgouse o ouro absoluto e júnior nos 800 libres, o bronce absoluto e a prata júnior nos 1500 libres, o bronce absoluto e o ouro júnior nos 200 bolboreta e o bronce absoluto e a prata júnior nos 400 libres.
“Estou moi satisfeita cos resultados“, asegurou nunha publicación no seu perfil de Instagram a nadadora. Ao remate da competición, Otero declarou que toca “facer unha pequena reflexión para poder aprender dos erros e seguir mellorando e medrando como nadadora”.
Ver esta publicación en Instagram
Tal e como destaca a Federación Galega de Natación, isto supón un dobre mérito para ela, xa que se atopa nunha tempada de transición, compaxinando o cambio de categoría cun ano critico a nivel escolar cursando segundo de Bacharelato e preparando EBAU.
Paula xa demostrou no último campionato de Europa Júnior a súa boa preparación facendo un impresionante campionato quedando a só unha centésima da medalla en 800 libres e conseguindo un bronce no 1500 libres.
Pero non só pertence ao grupo do Equipo Nacional Absoluto de piscina, senón que tamén é integrante do Equipo Nacional Junior de Augas Abertas.
