Paula Gutiérrez chega ao Dépor ABANCA. A mediocentro catalá estrearase na tempada 2021/2022 coa camiseta branquiazul defendendo as cores na Reto Iberdrola.
Os primeiros pasos da futbolista estiveron vinculados ao equipo da súa localidade natal, Viladecans, para despois fichar polo RCD Espanyol, club no que estivo ata o 2017.
Entón, a xogadora recibiu a chamada do FC Barcelona, equipo no que estivo co filial durante tres tempadas. Durante a súa etapa como blaugrana logrou o ascenso á Reto Iberdrola na 2018/2019 e sumou varias convocatorias co primeiro equipo, aínda que non chegou a debutar.
Xa no curso 2020/2021, Gutiérrez tivo a oportunidad de debutar na Primera Iberdrola da man do Madrid CFF, conxunto co que xogou máis de 300 minutos en 18 partidos e compartiu vestiario coa nova gardameta herculina María Sampalo. Durante esta campaña tamén participou co filial, xogando tres partidos e anotando un gol na segunda categoría.
Ademais, Paula Gutiérrez tamén ten experiencia como internacional sub16, sub17 e sub19, coincidindo no último con María Ruíz, unha das últimas fichaxes branquiazuis, no Campionato de Europa.
