María Ruiz Gámez (Almáchar, Málaga, 11 de xaneiro de 2001) incorpórase ao persoal do Deportivo ABANCA de cara á tempada futbolística 2021-2022.
A dianteira andaluza chega ao RC Deportivo ABANCA procede do Málaga CF, en cuxo primeiro equipo debutou con só 16 anos. Ademais, no curso 2018-2019, María Ruiz puido debutar en Primeira Iberdrola con só 17 anos. Aínda por riba, aquela tempada participou en 25 encontros, 16 deles como titular, e marcou 3 tantos. Ela mesma fora a autora do gol que certificou o ascenso do conxunto malaguista o curso anterior.
Esta nova etapa lucindo a elástica deportivista será, polo tanto, a primeira vez que María Ruiz opte por xogar nun equipo lonxe da súa terra.
“Feliz e ilusionada de empezar este novo reto! Desfrutar, traballar e aprender”, escribía nas súas redes a futbolista para anunciar a súa chegada ao club coruñés.
A traxectoria de María Ruiz, internacional Sub-19
Formada no club da súa localidade natal, o Recreativo Almáchar, e despois nas categorías inferiores do Málaga CF, en outubro de 2019 foi convocada pola selección española Sub-19 para disputar a fase de clasificación para o Campionato de Europa da categoría, competición na que marcou dous goles ante Acerbaixán e un contra Grecia e cuxa Rolda Elite e Fase Final foron suspendidas pola pandemia de COVID-19.
Feliz e ilusionada de empezar este nuevo reto!
Disfrutar, trabajar y aprender.
Vamos @RCDeportivo 💙👏🏽 https://t.co/wE43ahnWjZ— María Ruiz (@Mariagamezn10) July 7, 2021
