O Pontevedra Rugby Club deu xa os seus primeiros pasos na División de Honor B de rugby, aínda que comezou con mal pé. O seu primeiro partido na categoría e como conxunto foi contra un rival moi duro e superior, o Barcelona Universitari Club (BUC). As galegas non foron quen de superalas, e perderon por 0-94.
Este foi un estreo “duro” en palabras de Teresa Gálvez, capitá do conxunto galego. Aínda que a xogadora admite que o resultado non quita forzas ao equipo, que viviu en xeral “unha sensación bastente positiva, xa que era a primeira vez que xogabamos xuntas e tiñamos moitas ganas de volver ao campo”.
A pouca preparación (as galegas comezaron a adestrar hai un mes) e a falta de rodaxe e experiencia como equipo castigou ao Pontevedra RC no seu primeiro partido.
O rival tampouco puxo as cousas fáciles. O BUC é un dos favoritos da categoría e xa o curso pasado estivo preto de lograr o ascenso, algo que volveu demostrar este 2021 sobre o campo.
O primeiro duelo tivo que ser disputado lonxe do campo de adestramento habitual, Monte Porreiro. As galegas viaxaron ata Ourense para o seu debut, onde a sorte non as acompañou.
As galegas aguantaron durante oito minutos sen recibir ningún ensaio, pero en canto o BUC abriu a lata, o Pontevedra RC tivo pouco que facer. Helena Espada foi a responsable deste primeiro try das visitantes, que desde entón non deixaron de anotar. Cun 0-43 ao tempo de descanso, a remontada era xa imposible.
Na segunda parte a tónica do partido foi similar. Os esforzos constantes das galegas non se materializaban en puntos, polo que as catalás seguían aumentando a súa distancia, ata chegar ao 0-94 final.
Con todo, o Pontevedra RC segue coa fronte alta cara diante, e xa pensa no seguinte partido: ante o GE i EG o 17 de xaneiro.
¡¡Enhorabuena @buc1929 por la victoria. Ahora nos toca seguir aprendiendo de grandes rivales como vosotras y seguir creciendo. Hasta pronto y buen viaje!! https://t.co/eJEiu5dH97
— Pontevedra Rugby Club (@PontevedraRC) January 10, 2021
Podes volver desfrutar do partido nesta ligazón.
Gálvez explicou tras o partido que “comezamos con moita forza, na primeira parte plantámoslles cara, pero souberon aproveitarse dos nosos erros e iso levounas á vitoria”.
Teresa Gálvez, capitá do Pontevedra Rugby Club: “Foi un privilexio poder volver ao campo a pesar de toda a situación que estamos vivindo”
Uns fallos que, asegura, irán “pulindo” nos seguintes encontros. Ademais, a deportista galega e capitá do conxunto pontevedrés recorda que “foi un privilexio poder volver ao campo a pesar de toda a situación que estamos vivindo”.
O Pontevedra RC, un proxecto ilusionante, en palabras da súa capitá
A sorte non acompañou no inicio, pero a derrota non resta ilusión ás compoñentes da iniciativa do Pontevedra RC. En palabras da capitá, Teresa Gálvez, “o proxecto ilusionoume un montón, xa que o PRC é o meu club de toda a vida, onde empecei no rugby e estiven ata os 18 anos”, declaraba a As Nosas.
Teresa Gálvez: “Con este proxecto puiden volver a casa”
Como tantas outras, ao chegar á categoría senior tivo que cambiar de equipo e con este novo proxecto “puiden volver a casa”. Segundo recorda a xogadora, a creación do Pontevedra RC como equipo de máximo nivel permitiu “xuntar a mozas que estaban adestrando co PRC con compañeiras doutros clubs para xogar na División de Honor B e axudar así a crecer ao rugby galego”.
“Pola miña parte, estou moi orgullosa de todo o esforzo que se está poñendo tanto na directiva do club, como o equipo técnico e as compañeiras para que isto siga adiante”, concluíu.
Podes coñecer a todas as xogadoras que participaron no debut nesta ligazón.
O rugby galego estará representado na División de Honor B co Pontevedra Rugby Club
