Reto e ilusión son as palabras que definen a tempada que comeza esta fin de semana na División de Honor B de rugby, na que debutará o Pontevedra Rugby Club. O equipo, que ocupará o lugar do Muralla RC, estará formado por xogadoras de distintos puntos da xeografía galega.
“Para nós é un reto e o afrontamos con moita ilusión”, resume Rubén Sanmartín, segundo adestrador do conxunto galego. Sanmartín, xunto a Alberto Fernández como primeiro adestrador e Joaquín Maguna como delegado, completa o corpo técnico pontevedrés.
Desde o Pontevedra Rugby Club levaban xa varios anos intentando darlle unha saída de mellor nivel ás súas xogadoras, pero ata este 2021 non tiveron a oportunidade. O Muralla tomou a decisión de renunciar á súa praza, polo que esta se ofreceu a outro equipo galego, o Pontevedra RC, que tirará de canteira propia e de xogadoras doutros clubs para esta nova aventura.
Equipos galegos unidos nun mesmo club
A clave para a creación deste plantel de 45 xogadoras de rugby en pouco máis dun mes foi a unión de distintos equipos de Galicia, sobre todo da zona sur por motivos loxísticos.
“Creamos un plan de traballo con outros clubs. Non fichamos, por así dicilo, a ningunha xogadora. Nós a nivel Galicia propuxemos o noso equipo como sede e invitamos a todas as mozas cun nivel alto para xogar ao rugby”, explica o adestrador.
Así, o plantel de 45 xogadoras queda conformado con mozas de distintos puntos de Galicia: 10 chegan de Ourense, seis de Lalín, sete de Vigo, outras 10 de Santiago e 12 da propia canteira do Pontevedra RC.
Todas estas competidoras chegan cun nivel medio moi alto, polo que o técnico non quere destacar a ningunha. “Podería darte 45 nomes”, responde ante a pregunta de quen chega mellor preparada. De todas formas, Sanmartín móllase e fala de Teresa de Santiago, Coral de Lalín, Azucena de Ourense ou Sara de Vigo á vez que recorda que teñen especial cariño polas xogadoras da casa.
Así mesmo, sinala que a organización deste conxunto non tería sido posible sen a axuda da Federación Galega de Rugby. Segundo apunta, o organismo serviu como unha canle de comunicación importantísima entre os distintos clubs e segue mostrando o seu apoio constante polo novo equipo.
Así será o formato da División de Honor B
Esta nova aventura do Pontevedra RC será nunha competición que tamén é relativamente nova. A División de Honor B iniciou o seu camiño hai tres tempadas, cun formato curto (grupos, semifinais e final), e desde a tempada anterior engade unha fase regular.
Desta forma, tras unha primeira volta de sete xornadas, prevista para finalizar a mediados de marzo, os catro primeiros clasificados disputarán as semifinais do playoff de ascenso, xogando o primeiro contra o cuarto e o segundo contra o terceiro, a partido único e en casa do mellor clasificado.
A final polo ascenso directo tamén se disputará a partido único, na fin de semana do 10 e 11 de abril, nun campo designado pola Federación Española de Rugby.
O subcampión, terá unha nova oportunidade para ascender a Liga Iberdrola (onde xa compiten as coruñesas do CRAT Residencia Rialta) na promoción fronte ao penúltimo clasificado da máxima categoría, desta vez cun partido de ida e outro de volta.
Este formato, “curto e potente”, é unha axuda para os pequenos equipos, tal e como apunta o adestrador. “Ao final somos amateur e a xente ten traballo e familias, así que se se alonga pérdese a moita xente. Para a nosa forma de ver a competición, este formato axúdanos bastante”, conclúe.
Así, os oito equipos que competirán na categoría de prata esta tempada son:
- Crealia El Salvador
- XV Hortaleza RC
- Barcelona Universitari Club
- Getxo Giroa-Veolia
- AD Ingenieros Industriales
- CR Sant Cugat
- CE i EG
- Pontevedra Rugby Club
Os tres primeiros parten como favoritos para disputar a máxima categoría o próximo ano. O Salvador debutou na 19/20 na Liga Iberdrola, pero un mal inicio de competición acabounas castigando co descenso. O Hortaleza quedou o curso anterior ás portas do ascenso, nunha terceira posición que non lle permitiu subir de categoría ao ter sido cancelado o play off de ascenso pola pandemia.
O rival das galegas, o Barcelona Universitari Club compite desde os primeiros pasos da segunda división na categoría e tamén estivo a piques de colarse entre os equipos que finalmente ascenderon.
Estos serán os conxuntos máis fortes a priori pero, como recorda Rubén Sanmartín, “nunca se sabe. O deporte sorprende e o máis bonito disto é que podemos gañarles e logo perder contra un co que crías que ías gañar”.
Aínda así, recoñece que a rodaxe de ter experiencia na competición é algo que xoga a favor dos demais clubs, xa que o Pontevedra é o único novato da categoría.
Os catro clubs restantes tamén serán duros competidores. O Getxto Giroa-Veolia é un equipo histórico que chegou a alzar o título nacional en dúas ocasións pero nas últimas tempadas sufriu complicacións que as alonxaron das máximas categorías. Este 2021 voltan á competición nacional con ganas de volver a competir ao máis alto nivel.
O AD Ingenieros Industriales conta con caras novas ás súas filas, coa mente posta en sumar vitorias para subir de división. Pola súa parte, o CR Sant Cugat logrou clasificarse para os play offs do curso anterior e, outras catalás, do GE i EG chegan como subcampioas da fase de ascenso á División B.
O debut ten data no calendario: 10 de xaneiro
O primeiro partido que disputen o actual plantel do Pontevedra Rugby Club será ante o Barcelona Universitari Club (BUC), un dos clubs que promete estar entre os equipos fortes da Liga.
Pero isto non atemoriza ás novatas. “Somos un equipo de distintas partes de Galicia, que queremos xogar xuntas sen importar o rival”, declara o técnico pontevedrés.
Paso a paso, desde o Pontevedra non queren precipitarse e non pensan nin en ascensos ni en descensos. “Só queremos crear un bo bloque de mozas e darlles unha boa saída no rugby a un nivel mellor e desfrutar del”, resume. “É o que queremos facer esta tempada: xogar ao rugby e facelo ao máximo nivel”, remata Rubén Sanmartín.
O Pontevedra Rugby Club debuta ante un dos grandes da categoría, o BUC
Plantilla do Pontevedra Rugby Club na División de Honor B tempada 2021
