Cidade de As Burgas GLS e Poio Pescamar recuperaban o seu partido adiado entre semana, nun duelo no que as visitantes non acusaron o cansancio dun esixente calendario e resolveron o partido na primeira metade. O resultado final foi outra goleada para as ourensás: 1-6. A diferencia na táboa era notable e quedou reflectida na pista. Mentres as poienses aspiran ao máis alto e a acadar títulos, as ourensás confían en que con traballo, esforzo e entrega poidan salvar a categoría e seguir militando na élite cun equipo que mistura veteranía e canteira.
As pontevedresas do Poio Pescamar afrontaban este duelo dous días despois do último disputado, pero que non foi impedimento para dominar na pista. Pola contra, o conxunto dirixido por Manolo Codeso encaixa por segunda vez consecutiva unha goleada, que complica as súas posibilidades de saír da zona de descenso.
O Poio fíxose co Cidade de As Burgas xa na primeira metade
Por momentos, parecía que o Cidade de As Burgas GLS daba coa fórmula para ter controladas ás futbolistas visitantes. Sobre todo nos primeiros minutos, mentres que o Poio Pescamar buscaba abrir unha brecha no rival confiando en Dani Sousa no pivote.
Así chegou a primeira ocasión convertida para as de Manu Cossío, que estrearon o marcador no minuto cuatro de partido. A ourensá Antía Pérez anotou o primeiro gol do duelo na súa terra e como visitante.
Este tanto fixo crecer os ánimos entre as vermellas, que alternaban unha forte defensa cun efectivo ataque. Minutos despois chegaría un dobrete dunha inspirada Dani Sousa con dúas boas xogadas realizadas con Iraia.
No bando do Cidade de As Burgas GLS, a xove futbolista Sol Pedrera disparou a porta sen éxito. Pouco despois imitouna a súa compañeira Lucía Nespereira con igual resultado para as verdibrancas.
As conserveras tiñan fame de máis e marcharon ao descanso cun gol máis ao seu favor, asinado por Irene García, sentenciando practicamente o partido.
Tras o descanso, o ritmo do partido baixou e ambos conxuntos tiñan máis problemas para chegar á área contraria.
Pasados dez minutos, o Poio Pescamar volvía a acertar fronte a portería de Ana Lastra e sumaba outro tanto ao seu marcador. O Cidade de As Burgas GLS estaba xa sen opcións e despois de recibir o quinto chegou o sexto gol.
Só nos minutos finais as locais foron capaces de causar perigo ante as rivais. O tanto da honra foi obra de Sonia Pacios no minuto 39, un gol que non serviu para rascar puntos, que marcharon de Ourense con destino Poio.
Á fin deste partido, o Poio Pescamar empata a puntos co líder, o Futsi Atlético, mentres que o Cidade de As Burgas GLS mantén a penúltima posición, a catro puntos do colista.
FICHA TÉCNICA
1) CIDADE DE AS BURGAS GLS: Ana Lastra, Fara, Clara Fernández, Sonia Pacios e Lucía Nespereira – quinteto inicial -. Tamén xogaron: Aroa, Sol Pedrera, Nahir, Canolich, María Velle e Lucía.
6) POIO PESCAMAR: Silvia Aguete, Dani Sousa, Clara, Lucía, Ana Rivera – quinteto inicial -. Tamén xogaron: Antía Pérez, Irene, Iraia, Agustina, Julia e Miriam.
GOLES: 0-1 min 4, Antía; 0-2, min 12, Dani Sousa; 0-3, min 14, Dani Sousa 0-4, min 19: Irene; descanso. 0-5, min 30, Iraia. 0-6, min 35, Antía, de falta directa; 1-6, min 39, Sonia Pacios.
ÁRBITROS: Colexiados Carreira Romero (A Coruña) e Martínez Torres (Pontevedra). Amonestaron con tarxeta amarela á local Sol Pedrera e entre das visitantes sancionaron ás futbolistas Antía Pérez e Ana Rivera.
INCIDENCIAS: Partido correspondente á duodécima xornada da Primeira División do Fútbol Sala Feminino da Real Federación Española de Fútbol, disputado no pavillón de Os Remedios en Ourense, a porta pechada por mor das restricións que están vixentes en Galicia para frear o avance do contaxio da COVID-19 na nosa comunidade.
