Unha nova tempada na Primera División de fútbol sala xa deu comezo, cos catro equipos galegos que participan nela en posicións moi distintas da táboa. O Poio Pescamar e o Pescados Rubén Burela lideran a táboa, na primeira e segunda posición respectivamente. Pola súa banda, o Marín Futsal e o Ourense Envialia atópanse na zona baixa, nas posicións 12ª e 14ª.
Nesta primeira xornada competitiva, as escuadras de Cossío e Lucas asinaron dúas goleadas, cun 1-5 ante o Alcorcón no caso das vermellas e un 4-0 contra o Torreblanca Melilla no caso das laranxas. Pola súa banda, o Marín Futsal caeu derrotado por un 2-3 ante o poderoso Futsi Atlético, mentres que o Ourense Envialia perdeu contra o Móstoles por un 4-2.
Tres puntos e goleada para o Poio Pescamar
O mellor resultado desta xornada inaugural para os equipos galegos foi o do Poio, que visitaba ás xogadoras do AD Alcorcón FSF. Neste encontro, as vermellas lograron o desquite ante as amarelas, despois de perder ante elas no play off polo título na pasada campaña.
Neste novo duelo, as pupilas de Manu Cossío demostraron a súa superioridade desde o comezo, cunha Ana Rivera que abriría a lata goleadora no minuto 3. Pouco antes do descanso, a brasileira Dani Sousa anotaba o segundo nunha xogada a balón parado.
Despois da pausa, Jane aproveitou unha falta para ampliar a vantaxe galega e pouco despois Ana Rivera repetía como anotadora cun gol de vaselina. Nos intres finais, o Alcorcón loitou polo gol da honra, que conseguiu grazas a Laura, pouco antes do final. O pitido final chegaría co 1-5 no marcador, grazas a un último tanto para o Poio, obra de Lucía.
Nada mellor que un domingo saboreando a vitoria 😜#PoioPescamar #ReEvoluciónVermella pic.twitter.com/ZtwyPpbhdM
— Poio Pescamar FS (@PoioPescamarfs) September 19, 2021
As Guerreiras Laranxas estrean tempada en Vista Alegre con vitoria
As vixentes campioas da Primera División, as Guerreiras Laranxas, tamén estrearon o curso con vitoria en casa. O Burela recibía en Vista Alegre ao Torreblanca Melilla e antes do inicio do encontro ofreceu á súa afección o título obtido na pasada campaña.
Nesta xornada inaugural, o Burela colleou o mando do partido desde os primeiros minutos, controlando a un Melilla desbordado. O marcador abriuse no minuto catro grazas ao tanto de Ale de Paz e minutos despois as laranxas case fixeron o segundo, despois de recompoñerse dunha acertada ofensiva de Jhennif sobre a rede de Sandra Buzón.
Cami, Elena Aragón e Ale rondaban a portería rival de maneira constante, ameazando co segundo gol do partido. Este chegaría finalmente no ecuador da primeira parte, grazas a unha xogada das dúas primeiras. Peque e Leti tamén buscaron o terceiro, pero sen acerto.
Despois do descanso, o Melilla aumentou o nivel e o partido igualouse, pero chegado o minuto 35 Dany aumentaría a vantaxe laranxa cun dos seus clásicos xiros. As visitantes apostaron polo xogo de cinco, con porteira xogadora, pero de nada serviu. O Burela anotou o cuarto grazas a Emilly, para rematar o duelo nun 4-0.
Lucas: “O importante eran os tres puntos”
“O importante eran os tres puntos. Foi un partido lento, por momentos contaxiámonos do pouco ritmo que quería imprimir o rival. En defensa traballamos cada vez mellor pero temos que seguir facendo fincapé sobre o ataque e na rapidez en circulación de balón; imos avanzando pero aínda temos moito por diante”, reflexionaba así Lucas á fin do encontro.
O Marín Futsal trata de ti a ti ao poderoso Futsi Atlético
O Marín Futsal tivo a oportunidade de debutar na máxima categoría na pasada fin de semana, cun duelo ante un grande do futsal como o Futsi Atlético. As galegas, malia o nivel do rival, aguantaron o ritmo do encontro, apostando por unha férrea defensa.
A estratexia seguida polas locais foi a de ceder o mando ás madrileñas, apostando por esperar ás súas oportunidades para atacar. Así, o primeiro gol da tarde foi o de Laura Córdoba aos tres minutos, pero instantes despois as galegas reaccionaban poñendo o empate grazas a María León. O descanso chegaría coas táboas.
Tras o paso por vestiarios, o Futsi volveu controlar o tempo do partido, anotando o 1-2 nunha contra, pero Café fixo de novo o empate nunha xogada estratéxica de falta. Nos últimos compases o duelo mantívose igualado, pero con dominio madrileño. Finalmente, a superioridade das visitantes fíxose patenete cun último gol no minuto 35, que levaría os tres puntos a Madrid.
O Ourense Envialia cede ante o Móstoles
Tamén con derrota comezou o Ourense Envialia un novo curso. As ourensás visitaban ao Móstoles, equipo que demostrou ser máis efectivo en ataque. Xa nos primeiros minutos, as locais adiantáronse no marcador, pero un par de minutos despois Iria Saeta asinaría o empate.
Despois da pausa, as locais non ían deixar escapar a vitoria, e apostando pola presión arriba lograron facer o segundo. As de Morenín intentaban contrarrestar os ataques do Móstoles, pero sen acerto e cunha defensa máis feble, as locais anotarían o terceiro. O cuarto chegaría un par de xogadas despois, sentenciando finalmente o encontro.
⚽LIGA // 1DIV // J.01 // FINAL (4-2)
Goles: @Iriasaeta10 y @JudithPedreira
Esperamos que las lesiones de Iria y María Arias de nuestro lado y Celia por Móstoles queden en nada. El fustal tiene esto, pero…a ver si podemos respirar un poquito
¡Ánimo chicas!
🆚@FSFMostoles pic.twitter.com/6r5zYaAgaK— Ourense Envialia FSF (@OUenvialiaFSF) September 18, 2021
