A partir deste venres comeza a XLII Copa da Raíña de balonmán en Telde. Nela, o Atlético Guardés loita por acadar por fin un título que se lle resiste.
As galegas estrean este 21 de maio a fase final, na que oito equipos da elite do balonmán español citaranse para disputar a Copa no Pabellón Insular Rita Hernández. O rival das xogadoras do Baixo Miño será o Liberbank Gijón, nun partido previsto ás 18:30 horas.
O equipo dirixido por José I. Prades, subcampión da Liga Guerreras, ten como obxectivo vencer na nova edición deste torneo. Antes da celebración da Copa, as guardesas caeron ante o KH-7 Granollers, por un axustado 26-25.
Así chegan Guardés e Liberbank Gijón
Para a cita deste venres, Prades poderá contar con todas as súas xogadoras. Entre as filas do equipo do Baixo Miño estarán nomes como Sarah Valero, Paula Arcos e Paulina Pérez. Esta última destacou especialmente no apartado goleador, sendo a máxima anotadora do seu grupo na primeira fase da Liga Guerreras Iberdrola, con 84 tantos.
Desde a defensa os números non acompañan tanto ás galegas. Malia ter encaixado só catro derrotas, este é un equipo que acostuma a encaixar moitos goles, unha faceta que deberá mellorar cara a Copa.
O seu primeiro rival, o Liberbank Gijón, chega a este encontro marcado polas baixas. Na segunda fase da Liga caeron por un 19-23 ante as guardesas, polo que o seu obxectivo será desquitarse da derrota.
No último encontro ligueiro, as asturianas venceron despois dunha segunda fase en branco. Así, serán previsiblemente un conxunto complicado para as de Prades, que deberán empregarse a fondo para cumprir o seu obxectivo.
💥💥 Modo Copa 💥💥 pic.twitter.com/gdB2RHwYog
— Club Bm. Atl. Guardés (@Atlguardes_ofic) May 17, 2021
O partido poderá seguirse en directo
Este encontro poderá seguirse en directo na web de RTVE e a través da CRTVG. Ademais, a páxina web da Real Federación Española de Balonmano publicará as estatísticas en directo desde as 17:30 horas (18:30 horas na península).
