- O Granollers amarga ao Guardés a celebración do subcampeonato ao vencerlle pola mínima 26-25.
- Tras a derrota de onte do Rocasa Gran Canaria ante o Bera Bera, o equipo da Guarda xa é subcampión da liga Guerreiras Iberdrola 20/21 a falta dunha xornada.
- Nas filas do KH-7 Granollers, Guarieiro e Marta Mera romperon a alegría galega.
Nin a derrota pola mínima desta tarde ante o KH-7 Granollers (26-25, 12-12 ao descanso) poderá arrebatar ao Atlético Guardés o subcampeonato da Liga Guerreiras Iberdrola 20/21.
O Super Amara Bera Bera cantou o alirón o pasado fin de semana e onte gañou xa como vixente campión ligueiro ao Rocasa Gran Canaria (21-28). Esta vitoria donostiarra confirmou a segunda praza do Guardés xa de maneira matemática: as canarias, terceiras, aínda teñen dous partidos por disputar e aínda que poderían igualar ás xogadoras que adestra José Ignacio Prades en puntos (17) encaixaron dúas derrotas contra as guardesas.
Aínda que o conxunto que prepara Prades entraou ben ao partido (min. 12, 4-7), un parcial local de 6-0 en seis minutos sacou as cores a un Atlético Guardés que tardou en recomporse.
Un novo machadazo, esta vez visitante, permitiu chegar en táboas ao descanso. E aínda que as galegas volveron porse por diante (min. 38-14-15) este espellismo deu paso a un equipo vallesano que quere apurar até a última xornada as súas opcións de coarse en Europa. Entre unha Giulia Guarieiro inconmensurable e Marta Mera baixo paus amargando ás lanzadoras rivais o Granollers colleu o mando do partido a pesar dos intentos visitantes.
Como vén sendo habitual neste grupo polo título de Liga a emoción estivo presente até o final. O electrónico do Palau d’Esports lucía un axustado 22-21 a falta de cinco minutos. Mireia Torras, quen ao final do partido foi despedida xunto a Elaines Gomes polo club -non continúan a próxima tempada-, forzaba un 7m que anotaría a extremo Ana González para o +2 (23-21).
Paula Arcos circulou até 6 metros entre un e dous pola zona dereita da pista e apertou ao 23-22, pero de novo na seguinte acción o KH-7 Granollers fíxose de ouro con outro 7m (24-22). Marta Mera sumou a súa enésima parada para facer sombra esta tarde á dupla guardesa – Carratú / Sempere -.
E aínda que o Atlético Guardés tentouno todo (tempo morto de Prades incluído no 27:41) o atino estivo ao lado das xogadoras locais. Moreno para o 25-23 e aínda que Arcos apurou o soño co 25-24, Gomes xa sentenciou co 26-24. Nun dicir amén Rajnohová maquillou a derrota pola mínima (26-25).
O Guardés xa pensa na Copa da Raíña
Unha derrota que non debe embazar o fantástico subcampeonato conquistado polo Atlético Guardés esta campaña. Repiten desta maneira as galegas o seu segundo mellor resultado na División de Honra tras o título da 16/17 e o subcampeonato da 17/18 que concluíu con empate a puntos co campéon Super Amara Bera Bera.
Unha realidade xa matemática a falta dunha xornada e que referenda un traballo que o grupo soña con demostrar de novo na fase final da XLII Copa de SM a Raíña que o venres levanta o pano en Telde cun partido de cuartos de final contra o Liberbank Gijón (18:30 h, Pab. Rita Hernández).
FICHA TÉCNICA
26) KH-7 BM. GRANOLLERS (12+13): Nicole Wiggins, Imane Chayhab, Anna Colomer, Laia Moragues, Elene Vázquez, Mireia Torras (2), Giulia Guarieiro (11), Vegué (1), Carmen Prelchi (2), Marta Mera, Elaine Gomes (3), Ana González (3), Jana Castañera (2) e Janna Sobrepera (5).
25) CLUB BALONMÁN ATLÉTICO GUARDÉS (12+12): África Sempere (3), Sandra Santiago (2), Martina Mazza (2), Lorena Pérez, Estefanía Descalzo, Míriam Sempere, Paulina Pérez (3), Patrícia da Silva (1), Rosario Urban, Paula Arcos (6), Sarah Valero (2), Carla Gómez (1), Marisol Carratú, Erika Rajnohová (2), Laura Morais (1) e Daniela Moreno (2).
ÁRBITROS: Yon Bustamante López (Navarra) e Javier Álvarez Mata (Euskadi).
PARCIALES CADA CINCO MINUTOS: 0-2, 2-5, 5-7, 7-9, 11-9, 12-12 – descanso -; 14-14, 16-15, 19-16, 21-19, 22-21, 26-25.
INCIDENCIAS: Partido correspondente á sétima xornada no grupo polo título da Liga Guerreras Iberdrola disputado no Palau d’Esports de Granollers, con público.
