A última xornada da competición regular na Liga Iberdrola de voleibol chega esta fin de semana. Con ela, o CV Arenal Emevé afronta o seu último partido coa tranquilidade de estar xa salvado, pero buscando a vitoria ante o líder, o Feel Voley Alcobendas. A cita será o sábado, 6 de marzo, ás 18:00 horas.
Malia viaxar coa tranquilidade de non xogarse as permanencia, as lucenses non irán ata Alcobendas de paseo. “Non iremos a facer concesións”, declara o seu adestrador, José Valle.
O Alcobendas xógase a primeira posición
Non terán un fin de tempada nada doado as loitadoras. O seu anfitrión nesta fin de semana é un equipo que ven de conquistar a Copa e que en Liga suma 46 puntos en 21 partidos xogados.
Polo de agora, o Alcobendas é líder da clasificación, pero empatadas con elas está o CV CCO 7 Palmas, polo que o vencedor non se decidirá ata esta xornada. A consecución do título pasa por unha vitoria ante o Emevé, pero as galegas irán a “intentar sumar unha nova vitoria nesta Liga”.
A falta deste último partido, o equipo de Lugo ocupa a novena posición con 19 puntos, tres por riba do décimo, o Sayre, e tres por debaixo do oitavo, o Dos Hermanas.
Os puntos débiles do último rival do Emevé
Segundo apunta José Valle, que poderá contar con todas as súas xogadoras para esta última xornada, a clave do partido está nos saques. “Imos ter que sacar moi ben parar impedir que ataquen polo centro. As súas centrais son xogadoras altas e en boa forma física”, explica.
Pero esa non é a única fórmula. Ademais de ser fortes en ataque, é importante que as loitadoras sexan capaces de “bloquear e defender ás súas receptoras e oposta. Quizáis a oposta sexa máis determinante en ataque que as receptoras”, reflexiona Jose Valle.
Pase o que pase sobre a pista, o CV Arenal Emevé intentará “facer o noso xogo, sacar ben e poñer as cousas complicads desde o saque e defender”. Agora mesmo as galegas están nun gran momento de forma física nas accións de desfensa, e a iso se aferran para suplir a diferenza de estatura coas rivais.
Outro aspecto que ter en conta é os erros. “Se nas bases de reconstrucción e K1 cometemos poucos erros, teremos opcións de disputar todas as finais de set e iso é do que se trata para conseguir a vitoria”, subliña.
Gañen ou perdan, unha cousa é certa. O Emevé é equipo de primeira.
