Non importa o que pase o sábado sobre a pista do Alcobendas, o CV Arenal Emevé está matematicamente salvado. Non puideron celebralo sobre a pista, pero a vitoria do Madrid Chamberí sobre o Algar Surmenor Cartagena certifica a permanencia lucense.
Coa derrota das colistas, estas quedan a seis puntos das lucenses con só un partido por disputar. Desta forma, o Emevé despedirá a tempada sabéndose equipo de primeira división, un logro obtido grazas ao seu constante esforzo e traballo.
Tal e como recalcaba o seu adestrador, José Valle, o punto máis positivo desta inestable situación deportiva na que estaban as lucenses era o feito de depender de si mesmas.
José Valle: “Hai que pensar nos puntos que faltan. Xa haberá tempo para celebracións”
Coa permanencia acadada, o Emevé apunta máis alto
As loitadoras están salvadas, pero iso non quita que viaxen a Alcobendas coa intención de seguir sumando. Previsiblemente, a súa posición na táboa non variará nin con un trunfo, pero as lucenses aspiran a rematar esta dura tempada coa mellor puntuación posible.
Así, a última xornada, ante o Feel Volley Alcobendas, chega sen ningunha presión para as galegas, que só pensan en sumar unha vitoria máis.
