Semella que non hai quen poida co Pescados Rubén Burela, que segue invicto na segunda fase da Primeira División de futsal e visita na terceira xornada ao STV Roldán FSF. O partido terá lugar no municipal Gabriel Pérez Sánchez o sábado, 10 de abril, ás 12:00 horas. A cita poderá seguirse en directo por La7TV Región de Murcia.
Con todo, as laranxas teñen a meta común de pasar ao play off polo título. Así o expresaba a gardameta laranxa Jozi: “O obxectivo de todos é quedar entre os catro primeiros para poder disputar ese play-off“.
Galegas e murcianas están a niveis distintos nesta segunda fase
Esa meta de estar entre os catro primeiros conxuntos que loiten pola última das etapas cara ao título, é un obxectivo moi posible para as da Mariña, que tiveron un inicio da segunda fase perfecto, con dúas vitorias por catro goles a un, primeiro contra o Ourense Envialia FS e despois contra o Poio Pescamar.
O seguinte rival leva ao Pescados Rubén Burela fóra das terras galegas. Desta volta toca ir a Murcia. Alí, as lucenses enfrontaranse ao STV Roldán FSF, que chega defendendo a terceira praza por coeficiente e empatado co conxunto de Melilla. O equipo murciano demostrou unha gran solidez na súa casa ao longo da primeira fase, deixando escapar tan só puntos ante un intratable Futsi Atlético Navalcarnero (1-1) e o CD Leganés (3-3).
Nesta nova andaina, o conxunto murciano non empezou ben; espera as galegas en busca da primeira vitoria, tras a derrota con AD Alcorcón (1-2) e o empate con Torreblanca Melilla CF (2-2).
A porteira laranxa Jozi sinalou que este será o primiero encontro coas murcianas nesta tempada (non compartían grupo na primeira fase), polo que é o seu xeito de xogo deste curso, vai ser case un terreo descoñecido para o Burela. Hai vídeos, por suposto, pero ao non existir enfrontamentos directos, a sensación será diferente.
“Será a primeira vez que nos enfrontemos este ano co STV Roldal FSF”, advertía Jozi. “Co Ourense xa nos vimos en pretempada e co Poio Pescamar, na Copa da Raíña e Supercopa”, detallaba ao respecto doutros rivais desta fase.
Tal e como apunta Jozi, o STV Roldan FSF “reforzouse e uniu forzas este ano con UCAM. É un equipo novo e moi competitivo, está a demostralo xornada tras xornada e imos a Roldán esperando un partido difícil, pero confiadas en conseguir os tres puntos”, declaraba a cancerbeira das Guerreiras Laranxas.
Jozi: “Imos a Roldán esperando un partido difícil, pero confiadas en conseguir os tres puntos”
A porteira Jozi subliña o bo momento goleador do seu equipo
A porteira hispano – brasileira Jozi mostrouse moi orgullosa da continuidade que está a amosar na facete defensiva o Pescados Rubén Burela, destacando a súa solidez, algo que sempre aporta tranquilidade ás gardamallas.
Jozi: “Sempre é unha alegría marcar, aínda que é unha oportunidade pouco frecuente para os porteiros”
Ademais, recordou o seu protagonismo goleador da semana pasada coa firma do cuarto tanto ante Poio, de portería a portería: “Sempre é unha alegría marcar, aínda que é unha oportunidade pouco frecuente para os porteiros. Hai que celebralo, é unha motivación extra. Aínda que o máis importante é seguir traballando co equipo; tanto Sandra coma min queremos acabar coa portería a 0 en cada partido, o equipo traballa para iso, as nosas compañeiras axúdannos en defensa. Oxalá puideramos cumprir coa portería a 0 e seguir marcando goles” dicía entre risas a 1 laranxa
Volve Julio Delgado ao banco do Burela
Despois de dous partidos de sanción, Julio Delgado volverá sentar no banco mañá. Na expedición do Burela non viaxaron Luísa Mayara, por enfermidade, nin Cami, por unha tendinite. O equipo pechou a semana de adestramentos esta mesma mañá en Murcia.
Esta é a súa convocatoria:
- Jozi
- Dany
- Sandra Buzón
- Peque
- Lara Balseiro
- Jane
- Bea Mateos
- Ale de Paz
- Elena Aragón
- M. Cortés
