- En Bergondo, co gallo do 8M, proxectaranse as pezas audiovisuais ‘Irene a porteira’, para escolares, e ‘ Campionas esquecidas’ e ‘ Karbo, escola de fútbol’ para todos os públicos.
- O sábado 12 de marzo haberá unha ‘ Andaina pola igualdade’ no novo roteiro ‘ Outeiros do Mandeo’ para a que é necesaria inscrición previa.
O Concello de Bergondo, na provincia da Coruña, conmemorará mañá o 8 de marzo, Día Internacional da Muller, cunha programación de actividades centrada no papel da muller no mundo do deporte baixo o lema ‘Elas tamén levan o 8’, buscando dar visibilidade a que a historia ocultou unha parte importante do rol das mulleres tamén neste ámbito.
Para iso organizouse unha acción dirixida a escolares, coa proxección da película ‘Irene a porteira’ e unha charla sobre a loita da muller no mundo do fútbol, e outra para todos os públicos coas pezas audiovisuais ‘Campionas esquecidas’ e ‘Karbo, escola de fútbol’ que levará a cabo ás 17 horas na Casa da Cultura do propio Concello de Bergondo. A asistencia a estas actividades é gratuíta.
Ademais, co gallo do 8M tamén se programou unha ‘Andaina pola igualdade’ para o sábado 12 de marzo. As e os participantes percorrerán os 3,16 quilómetros do novo roteiro ‘Outeiros do Mandeo’ que percorre Fiobre e Mariñán. A saída está prevista para as 12 horas desde o parque infantil de Fiobre e é necesario anotarse previamente, ata o xoves 10 de marzo, a través do formulario web que atoperedes nesta ligazón.
