Entre das actividades ligadas ao 8M (Día Internacional da Muller) que puxo en marcha a Deputación da Coruña estivo unha xornada adicada a reflexionar sobre as desigualdades no deporte que tivo lugar o xoves, 14 de marzo na sede da Fundación Luís Seoane e que tivo por título ‘Brecha de xénero no Deporte’. Na actividade colaborou a Fundación Real Club Deportivo de La Coruña.
Na apertura da xornada participou o presidente da institución provincial, Valentín González Formoso, que fixo referencia con cifras á desigualdade que aínda é patente no mundo do deporte. Nesa apertura foi parte tamén a alcaldesa da Coruña, Inés Rey, que incidiu tamén na necesidade de poñerlle fin a esa fenda de xénero que existe no ámbito do deporte.
Ver esta publicación en Instagram
O presidente da Deputación da Coruña, Valentín González Formoso, reivindicou a participación das mulleres na toma de decisións dos diferentes estamentos deportivos como medio para eliminar a desigualdade que existe nese ámbito. Formoso afirmou que, “pese a que a aparición de referentes no deporte feminino e o incremento do número de mulleres na práctica deportiva é constante, non o é a súa participación na toma de decisións”, algo que, ao seu xuízo, implica que “mentres non contemos coa súa perspectiva, será imposible acadar a igualdade”.
Valentín González Formoso, presidente da Deputación da Coruña: “Pese a que a aparición de referentes no deporte feminino e o incremento do número de mulleres na práctica deportiva é constante, non o é a súa participación na toma de decisións (…) mentres non contemos coa súa perspectiva, será imposible acadar a igualdade”
O presidente provincial recordou tamén que “a eliminación de estereotipos e roles é un traballo arduo”, pero animou a perseverar, tanto dende as institucións como no plano individual. “Cada un de nós, como individuos e como parte da sociedade, temos a responsabilidade de contribuír a pechar esa brecha”, asegurou.
Valentín González Formoso: “Hai obstáculos na cancha, e tamén nos despachos”
“Hai obstáculos na cancha, mais tamén nos despachos”, insistiu, e puxo sobre a mesa datos como que só 3 das 66 federacións deportivas españolas están presididas por mulleres, que unicamente un 24,3 % das licenzas son femininas ou que mentres o 98 % dos deportistas profesionais gozan dun contrato a tempo completo, no caso das mulleres esa porcentaxe descende por debaixo do 78 %.
A alcaldesa da Coruña, Inés Rey, sinalou que “por desgraza este tipo de xornadas seguen a ser moi necesarias porque as mulleres seguimos atopando moitas máis trabas que os homes, especialmente no campo do deporte”.
Inés Rey, alcaldesa da Coruña: “por desgraza este tipo de xornadas seguen a ser moi necesarias porque as mulleres seguimos atopando moitas máis trabas que os homes, especialmente no campo do deporte”
Rey lembrou que A Coruña é unha cidade de mulleres pioneiras en todos os ámbitos e destacou a Irene González Basanta, primeira porteira galega, na visibilización da muller no fútbol. “Irene desafiou os estereotipos da súa época e cumpriu o seu soño de xogar ao fútbol, sendo hoxe espello para moitas nenas que deixaron de ver no xogo unha barreira converténdose mesmo en campioas mundiais coa selección española”, indicou.
A alcaldesa tamén lembrou diversas actuacións postas en marcha polo Concello da Coruña como a equiparación dos trofeos masculino e feminino do Teresa Herrera no seu primeiro mandato, ou a concesión de bolsas deportivas a deportistas individuais, das cales o 50% son concedidas a mulleres.
A linguaxe sexista na comunicación deportiva
A xornada arrincaba cunha conferencia impartida pola xornalista deportiva e investigadora da UDC, Claudia López, sobre “A linguaxe sexista na comunicación deportiva”. Con exemplos do día a día, Claudia López deixou claro como na comunicación deportiva caemos de xeito recurrente en estereotipos. Tamén se puxeron exemplos que apuntaban a que o trato do deporte feminino con respecto ao masculino non é igualitario. Unha proba delo é que para facer referencia a disciplinas femininas engádese a adenda de “feminina”, así falamos de fútbol a secas (cando é masculino) e fútbol feminino (cando é feminino).
Debate sobre a brecha de xénero no deporte
Logo da conferencia de Claudia López levouse a cabo unha mesa na que se debatiu sobre esa brecha de xénero no deporte. Tratáronse cuestións como as diferenzas salariais entre mulleres e homes ou a reducida presenza feminina en postos técnicos e directivos, coa consecuente perda de influenza na toma de decisións.
Participaron nesa mesa a adestradora do Dépor Abanca, Irene Ferreras; a campioa de España de xavelina, Carmen Sánchez Parrondo Menchu; a cofundadora e directiva do Hockey Club Coruña Feminino, Mar Barcón; a xogadora do Dépor Abanca Lía Muíño; da ex xogadora internacional de rugby, directora técnica e vicepresidenta do CRAT A Coruña, Elena Roca e a xornalista e directora do xornal deportivo As Nosas, Silvia Carregal, que moderou a conversa.
Reflexionouse sobre estereotipos, a importancia de contar con referentes, a maternidade, a menor presenza de mulleres en facetas como adestradoras, xuízas ou directivas en clubs e federacións.
A profesionalización vai máis aló dun salario
Falouse tamén da necesidade da profesionalización da práctica deportiva realizada por mulleres, non so no que atinxe a que estas reciban unha remuneración polo seu traballo. Neste sentido púxose en valor a consecución de convenios colectivos como o do fútbol.
Pero ao falar de profesionalización fíxose fincapé en que esa cuestión vai máis aló do pago dun salario. Faise imprescindible contar tamén con instalacións, equipos técnicos e médicos, acordes a un desarrollo profesional da actividade deportiva. Contar, en definitiva, coas ferramentas que permitan competir en igualdade de condicións e oportunidades para que esa fenda de xénero no deporte finalmente se elimine.
Ver esta publicación en Instagram
´O Informe 2024: Igualdade de xénero no deporte galego´, elaborado polo Observatorio do Deporte do Clúster Galego da Industria do Deporte e Benestar, foi un dos documentos que se empregaron neste debate para reflexionar con cifras concretas sobre cuestións como o liderado e a presenza da muller en postos de dirección.
Houbo tempo tamén para as intervencións do público que achegou ao debate cuestións moi interesantes.
No final da xornada se recuperaban como broche final as palabras de Ivana de Andrés poucos días antes no Parlamento Europeo. A futbolistas apuntaba que temos unha “ferramenta única, capaz de transformar as persoas, de reeducar e de facernos pensar dunha maneira máis xustao e igualitaria. O deporte emociona, transforma e educa, debemos saber usalo do xeito correcto. Debemos darlles referentes femininos nos que poidan verse reflectidas, estamos no bo camiño pero somos ambiciosas. As nenas xa non queren ser Cristiano o Ronaldo. Queren ser Alexia Putellas ou Aitana Bonmatí. A seguinte Alexia está aí fóra. Elas só queren unha oportunidade e debemos dárlla”, apremiaba a futbolista.
