Este sábado, 29 de maio, a cidade da Coruña celebra o 25 Rallye, no que competirá o Melmac Rally Factory, o único equipo 100% feminino a nivel galego e español.
A piloto Ruth Ortega é a mente detrás desta escudaría, coa que competirá na Coruña con Esther Gutiérrez como co piloto e co dorsal 72. Co número 71 participarán Leti López como piloto e María Martínez como copiloto, a outra parella do Melmac Rally.
As orixes do Melmac Rally Factory
Este equipo feminino leva en marcha desde o 2019 e desde entón está integrado exclusivamente por mulleres. Ruth Ortega levaba xa un par de anos dándolle voltas á idea de fundar un conxunto só feminino, para animar a outras mozas interesadas no mundo do automóbil a competir e participar nas copas.
A galega foi pasando por varios institutos de Formación Profesional en busca das súas futuras mecánicas, e atopounas en Sandra Vázquez e Nadia Dono. “Desde aquela seguimos as mesmas e imos aumentando pouco a pouco”, engade a piloto.
No mesmo ano compezaron a competir, pero o embarazo de Ortega aparotouna dos circuítos, polo que tivo que parar a tempada. As mecánicas pasaron a traballar con outros equipos para seguir formándose e aprendendo durante a súa baixa, polo que agora, “volvemos a empezar”.
Para a tempada 2021 no Melmac Rally Factory teñen programadas dez carreiras, sendo a primeira o 25 Rallye A Coruña.
Ruth Ortega: “Non está tan normalizado que compitan mulleres”
O 25 Rallye A Coruña, un torneo dobremente especial
A competición coruñesa suporá a volta ao voltante de Ortega e a primeira competición en Galicia desde a pandemia. Un rally dobremente especial porque “A Coruña é casa”.
Ruth Ortega: “Teño moitas ganas porque ten moito nivel. Os rallys de aquí son alucinantes”
A galega non competiu nunca no circuíto herculino, só en categoría nacional, polo que “teño moitas ganas porque ten moito nivel. Os rallys de aquí son alucinantes”. A emoción pálpanse na voz de Ruth Ortega, quen confesa que “estou moi nerviosa pola volta, porque é un ano difícil, e sobre todo polos rivais, porque hai rivais de moitísima calidade”.
No relativo aos tramos da competición, a piloto admite que ten respecto ao de Coirós, porque “é un tramo moi complicado, técnico, pero tamén considero que é perigoso. Non é que o vexa só complicado por correlo, senón que é perigoso”.
No extremo contrario, o favorito de Ortega é o de Aranga, “porque é máis cercano á miña casa e é o que vou ver cando hai rallys. Faime ilusión facelo e está chulísimo o tramo”.
Os coches de Ruth Ortega e Leti López
Para o 25 Rally A Coruña, como a proba entra no Volante FGA, os coches non poden ter modificacións. “É unha copa promoción, na que imos todos en igualdade de condicións”, explica Ortega.
O seu coche é un 206 que vai de serie completamente, só ten uns freos novos e unha nova amortiguación por motivos de seguridade. O da súa compañeira Leti López é un 107 da Copa de Cataluña, tamén de serie, pero con menos cabalos que o da piloto naronesa. “Pero tamén é un coche que vai poder ir moi rápido se quere e sen modificación ningunha”, engade.
Compañeiras e rivais no mesmo equipo
Respecto ao resto de equipos participantes, Melmac Rally Factory ten no resto de debutantes aos seus principais rivais. A proba do 25 Rallye A Coruña puntúa dobre, para o Volante FGA e para o novo Open Donas Gadis.
Ruth Ortega: “Leti e eu, ademais de ser compañeiras de equipo, seremos rivais directas”
Nesta última competición están inscritos os dous coches da escudaría feminina, polo que, “ademais de ser compañeiras de equipo, seremos rivais directas”. Ruth Ortega, que volve aos circuítos tras o seu embarazo e a pandemia, e Leti López, piloto debutante, enfrontaranse entre si en nome do mesmo equipo. “Logo está o Top 3 inalcanzable. Pero ninguén di que a final de tempada non o poidan ser, non se sabe”, engade a primeira.
Tamén figuran como copilotos da proba coruñesa outras mulleres. Estes son os seus nomes: Raquel Rodríguez Triñanes, Sara Fernández Palazuelos, Nuria Rebollido Castro, Carmen González Montenegro, Yadira de Diego Gómez, Bárbara Gómez Oubel, Tamara Díaz Allegue, Lucía González González, María Adelaida Porta Pérez, Enma Santos Vidal, Lara Gómez Rodríguez, Elena Fernández Amor, María Teresa López Hospido, Lucía Pérez López, Rosa Isabel Rivas Núñez, Berta Pan Cambón, Vanessa Monterroso Manteiga, Jessica Piñeiro Castro, Cristina Torres Pintos, Mara Pellón Andrade, Lorena Maroño Souto, Paula Vázquez Salgado.
Os obxectivos de Ruth Ortega nesta tempada
O primeiro obxectivo que se marca Ruth Ortega na súa volta co Melmac Rally Factory é o Open Donas Gadis, “por medirme e saber onde estou despois de tanto tempo parada”.
Para o resto da tempada, a súa intención é a de manterse na metade superior da táboa “e sobre todo, seguir aprendendo e sumando quilómetros, e que todo saia ben, acabar rallys, puntuar e levarnos a experiencia”.
