O dobre duelo amigable da Selección Española de futsalfem ante Japón trouxo consigo o debut de dúas xogadoras galegas co combinado español absoluto: Candela Soria e Martita. Esta última, que xa pasara polas categorías inferiores, fixo un balance positivo dos seus primeiros encontros coas ‘maiores’.
“Vou contenta e con boas sensacións. Foi unha aprendizaxe enorme, tentei absorber ao máximo todo. Ademais, hai un grupo xenial que mo puxo moi fácil”, recoñece a xogadora do Poio Pescamar, que volveu traballar ás ordes de Clàudia Pons: “Xa a coñecía, así que moi ben. Fíxase nos pequenos detalles, algo que che axuda moito, É unha aprendizaxe con ela”, explicaba a xogadora ao equipo de comunicación da RFEF.
A única espiña para ela foi non lograr a vitoria nos dous encontros fronte a Japón, dos que destaca: “Tivemos o manexo de balón e quizá nos custou para gol. Non estivemos acertadas e as súas porteiras si. Ademais, nas ocasións que tiveron elas si tiveron ese acerto. O balance é positivo a pesar dos resultados”.
Candela Soria: “Non esperaba a convocatoria e recibina con moita ilusión”
No caso de Candela Soria a chamada da seleccionadora Clàudia Pons pilloulle por sorpresa. “Non ma esperaba agora e recibina con moita ilusión. Estou moi contenta e agradecida pola oportunidade. É algo que toda xogadora desexa”, recoñece a futbolista do Ourense Envialia na web da RFEF a deportista galega.
Tras dous anos na Coruña nos que completou os seus estudos de INEF, regresou ao seu Ourense natal como unha xogadora moito máis completa. “Estas dúas últimas campañas no Viaxes Amarelle FSF servíronme para dar o salto que necesitaba. Alí, na Coruña, experimentei a nova posición de pivote e agora en Ourense están a saírme as cousas grazas a esa progresión e esa oportunidade en Amarelle”, apunta a deportista galega.
