O punto de mira nesta Liga Galega de Hoquei a Patíns, no caso do HC Borbolla, está en acadar o xeito de subir de categoría. Así o apuntaba o seu adestrador, Santiago Martínez Cancelo, que non agochaba que as aspiracións das de Monte Alto están fixadas en acadar un oco na fase de ascenso á máxima categoría. En concreto, apuntaba o adestrador: “Queremos clasificarnos para a fase de ascenso e tentar o ascenso á Ok Liga”.
Santiago Martínez saca peito polo grupo que adestra no HC Borbolla polo equilibrado que pensa que estará. “Coido que temos conformado un plantel moi compensado no que, ao facer cambios durante o partido, non se note moita diferencia entre as xogadoras que saen coma titulares e as os cambios que fagamos”.
Santiago Martínez, adestrador, HC Borbolla: “Coido que temos conformado un plantel moi compensado”
Destaca Santiago Martínez o traballo feito anos atrás coa canteira deste club coruñés. “A base do equipo é xente das categorías de base do club. Nenas que se iniciaron no hoquei a patíns non noso club, coas lóxicas incorporacións. Este proxecto iniciámolo hai uns cinco anos, con nenas de 13-14 anos do club e coas que agora, que teñen 19, intentaremos dar o salto á OK Liga”.
Santiago Martínez, adestrador, HC Borbolla: “Este proxecto iniciámolo hai uns cinco anos, con nenas de 13-14 anos do club e coas que agora, que teñen 19, intentaremos dar o salto á OK Liga”
Lembra Martínez Cancelo que realmente “o ascenso o tiñamos logrado aos tres anos, pero por un tema económica non puidemos participar ese ano”. O técnico das galegas advirte: “Esta tempada témonos reforzado con tres xogadoras e esperamos que dar o salto definitivo”.
Ao respecto do primeiro cruce, o adestrador do HC Borbolla, Santiago Martínez, sinala que o HC Deportivo Liceo “é un dos favoritos da competición e busca o noso mesmo obxectivo. Supoño que será, como sempre, un partido moi igualado e no que calquera pequeno detalle pode decidir o resultado final”.
Este duelo entre clubs da Coruña disputarase na cidade herculina o domingo 2 de febreiro ás 13:30 horas e será arbitrado polo colexiado Francisco Javier López Quinteiro.
