- Julia Paradela compaxinará a súa presenza no equipo de Liga Iberdrola coa participación no conxunto de Primeira Nacional.
- “É a típica xogadora que todo adestrador quere ter dentro do equipo: é responsable e comprometida, sacrifícase polo grupo. Necesitamos ter alguén como ela dentro do grupo”, sinala Manuel Blanco sobre Paradela.
- “Eli é guerreira, loitadora, ten un carácter competitivo incrible. Ela tira do equipo en todo
momento e saca a cara por todas as súas compañeiras. É unha garantía de madurez e seguridade nunha faceta tan complicada como a recepción”, afirma o técnico sobre Eliana González.
O CV Arenal Emevé chegou a un acordo con Julia Paradela e Eliana González para que formen parte das Loitadoras unha tempada máis. O bloque que dirixirá Manuel Blanco ao longo da tempada 22/23 ten cada vez máis definidos os seus piares e a continuidade de ambas as xogadoras supoñerá un importante impulso para elevar a competitividade do equipo de Liga Ibedrola.
Para Paradela será a sétima tempada no primeiro equipo do Arenal Emevé, un curso no que terá un reto engadido moi especial: exercer de mentora das xogadoras do equipo sénior. A receptora lucense compaxinará a súa presenza na liga Iberdrola coa participación no equipo recentemente ascendido a Primeira Nacional no que terá un valor capital á hora de transmitir a súa experiencia ás súas compañeiras.
Manuel Blanco sobre Julia Paradela: “É responsable e comprometida, sacrifícase polo grupo”
Tamén continuará no Municipal outro referente dentro e fóra da cancha: a líbero Eliana González. A xogadora comezará despois do verán a segunda tempada da súa segunda etapa no club tras ser unha peza crave no grupo que logrou o subcampeonato na Copa da Raíña. Tanto para Eliana como para Julia o primeiro reto será a Supercopa de España que enfrontará o próximo mes de setembro ao seu equipo co Haris La Laguna.
Manuel Blanco: “Julia Paradela é a xogadora que todo adestrador quere ter”
Manuel Blanco expresou a súa satisfacción pola continuidade de ambas. O técnico do CV Arenal Emevé destacou de Julia Paradela que “é a típica xogadora que todo adestrador quere ter dentro do equipo: é responsable e comprometida, sacrifícase polo grupo.
Necesitamos ter alguén como ela dentro do grupo.” Pola súa banda, sobre Eliana González subliña que “é guerreira, loitadora, ten un carácter competitivo incrible. Ela tira do equipo en todo momento e saca a cara por todas as súas compañeiras. É unha garantía de madurez e seguridade nunha faceta tan complicada como a recepción”.
Manuel Blanco sobre Eliana González: “É guerreira, loitadora, ten un carácter competitivo incrible. Ela tira do equipo en todo momento e saca a cara por todas as súas compañeiras”
Tras estas dúas renovacións o equipo feminino do CV Arenal Emevé conta cos seguintes nomes confirmados para a próxima tempada: Lucía Prol, Jimena Fernández Gayoso, Carolina Camino, Mame Diouf, Ainara Burgo, Lida Figueira, Candela López, Uxía García, Alejandra Pérez, Valentina Galiano, Julia Paradela e Eliana González.
