Este martes, 16 de febreiro, o Conservas Orbe Rubensa BM Porriño recuperará o encontro adiado ante o Club Balonmano Morvedre en Valencia, xogando ás 20:00 horas en Sagunto.
Este duelo, orixinalmente programado na fin de semana do 23 de xaneiro, enmárcase dentro da novena xornada da Liga Guerreras Ibedrola. Un gromo de COVID-19 no conxunto valenciano impediu que o encontro se celebrase como se tiña previsto.
Isma Martínez: “O partido de Elche o xogamos máis por minutaxe que por rendemento, porque xogándonos o que nos xogamos non podíamos desgastar á xente”
As galegas chegan de perder contundentemente ante o Club Balonmano Elche, pero o adestrador Isma Martínez quítalle ferro a esta derrota: “O partido de Elche o xogamos máis por minutaxe que por rendemento, porque xogándonos o que nos xogamos non podíamos desgastar á xente. Este é o partido máis decisivo, xunto co de Córdoba”, sentencia.
O técnico do Porriño ten claro que o futuro do equipo na máxima categoría pasa por unha vitoria ante as valencianas. O club galego atópase no sexto posto cun total de cinco puntos. Dous puntos por debaixo, con tres, está o Morvedre, que chega dun empate na fin de semana ante o Liberbank Gijón, o cuarto clasificado.
Partido clave para o Porriño
“Hai que ser conscientes de que é un partido clave para quen o leve. Estes dous puntos poden ser claves de cara á segunda fase”, anuncia o técnico pontevedrés.
Isma Martínez: “Estes dous puntos poden ser claves de cara á segunda fase”
O rival das galegas para este partido entre semana é unha versión mellorada de si mesmo. En palabras do adestrador do Porriño, “o Morvedre mellorou moito o seu equipo con respecto á primeira volta. Creo que a incorporación de Juliana Borges é fundamental para elas”, apunta.
Martínez tamén advirte dos perigos das que serán locais nos lanzamentos, sendo efectivas a ambos lados e con “moi bos pivotes”. Porén, móstrase optimista, xa que “é un equipo ao que lle gusta correr tanto en saque de centro como en segunda ondada, a nós ese ritmo de partido vainos ben”, declara.
Aprendendo dos últimos encontros, o Porriño deberá corrixir erros e aumentar o nivel da súa defensa para xogar con máis profundidade.
