O Dépor ABANCA xogará este sábado, 15 de maio, contra o RCD Espanyol, un rival directo pola permanencia. Esta é unha das últimas balas na recámara das branquiazuis, polo que a súa capitá, Iris Arnaiz, non dubida xa en falar do duelo como unha final. “Esta é a nosa última oportunidade para estar enganchadas aí e conseguir a permanencia”, declaraba a futbolista.
A asturiana afirma que o equipo afronta o partido ante as catalás “como unha gran final, que é o que é”, xa que o encontro do sábado é “o partido máis importante que temos”, pero con “moitísima ilusión e moitas ganas porque é o que queremos todas, sacar isto adiante e canto antes mellor”.
A dificultade deste reto non desanima a Iris, quen se mostra optimista e asegura que “creo que vai saír ben porque estamos acostumadas a xogar baixo esa presión, por así dicilo, e estamos con ganas de sexa xa sábado para que chegue o partido para gañar e, se podemos gañar o goal average a favor contra o Espanyol, moito mellor”.
A exdeportivista Maya é un dos puntos fortes do Espanyol
No partido de ida as futbolistas do Dépor ABANCA reencontraronse coa exbranquiazul Maya, unha das xogadoras claves na vitoria catalá. Para Iris Arnaiz, a ex do club herculino e “a xogadora diferencial do Espanyol”.
Nas súas palabras, a xaponesa “tecnicamente é espectacular, sabe protexer moi ben o balon e ten unha visión de xogo incrible. Malia ser baixa vai ben de cabeza. Encantariame que estivera no meu equipo, pero por desgracia non é así”.
Con todo, esta non é a única futbolista que destaca do equipo rival. A asturiana recoñece que outras pezas importantes do xogo perico son Baudet, “unha xogadora incrible”, ou Anaïr Lomba, “que está a un nivel espectacular”. En resumo, o Espanyol “ten xogadoras moi interesantes, que imos ter que tapar e sufrir con elas e creo que estamos todas preparadas para iso”.
Abegondo é o “noso pequeno fortín”, segundo Iris
Como punto a favor o Dépor ABANCA poderá contar co factor campo. Abegondo sempre é un terreo de xogo favorecedor para As Nosas, pero especialmente se conta coa presenza de público.
“Sen dúbida Abegondo é o noso pequeno fortín. Desde que hai público os resultados foron moitísimo mellores para nós e nótase. O día do Valencia foi incrible e o Madrid tamén. Incluso contra o Huelva e os partidos que gañamos en casa foi grazas á afección”, salienta a capitá.
Iris Arnaiz: “Entre todos conseguiremos a vitoria”
Por estes motivos, Iris Arnaiz pide un esforzo extra para esta xornada: “Esta fin de semana necesitamos á afección e que apreten porque nós o imos facer. Entre todos conseguiremos a vitoria, que é o que quere todo o deportivismo e sobre todo o que queremos nós”.
Os erros a balón parado pasaron factura en Sevilla
Na última xornada o Dépor ABANCA perdeu o fol acumulado das citas anteriores e caeu derrotado ante o Sevillla por un 3-1. Este resultado foi “un palo bastante duro” para as deportivistas, xa que a súa capitá admite que o partido “non saiu como esperabamos”.
O Dépor ABANCA recibe de novo o castigo dunha derrota inmerecida, esta vez en Sevilla (3-1)
Os goles a balón parado foron demasiado castigo para as galegas, que aínda teñen pendente corrixir estes erros. “Non estamos sendo duras a balón parado, en total fannos 7 ou 8 en contra en balón parado. É un punto débil no que estamos traballando. Somos conscientes de que é unha acción colectiva, que temos que estar todas concentradas durante o tempo que dure a xogada e sobre todo gañar as segundas xogadas que é o que máis dano nos fai”, analiza Iris Arnaiz.
A centenaria Peke, fundamental no vestiario deportivista
Iris Arnaiz xa forma parte do club das xogadoras centenarias, e recentemente uniuse a el Peke. A dianteira leva xa cen partidos defendendo a camiseta branquiazul desde que chegou ao club no 2017, e convertiuse “nun referente para nós”, en palabras da asturiana.
Iris Arnaiz: “Peke é unha xogadora que te pode solucionar partidos”
“O ano pasado en 7 dias ou 10 días marcou 10 goles e esa é Peke”, recorda a capitá, quen asegura que “é o estado de ánimo de todas. Cando estamos ben nótaselle que está ben, cando estamos mal non aparece moito. Peke é unha xogadora que te pode solucionar partidos, pensas que non está e marca dous goles de repente. É súper competitiva e sempre quere marcar gol e é das mellores cousas que nos pode pasar. Ter unha xogadora así, sobre todo arriba, que sempre quere marcar goles e gañar sempre é o bo”.
Pero a vasca tamén é importante fóra do campo. Segundo Iris Arnaiz, a dianteira é fundamental no vestiario: “Todas levámonos moi ben e Peke é das míticas que sempre fai bromas no vestiario e fóra del para manter isto con alegria. Ao final, faise duro estar todas as fin de semanas aí abaixo e o que non podes facer é afundirte. Hai que sacar o mellor de cada unha e Peke é desas xogadoras que saca o mellor de cada unha para os adestramentos e para os partidos”.
Nesta situación tan delicada que está a vivir o Dépor ABANCA, outras dúas futbolistas con experiencia son parte vital no banco branquiazul. A centrocampista sinala que tanto Alba Merino como Villegas están a levantar os ánimos do equipo, xa que pasaron con anterioridade por situacións similares.
Iris Arnaiz confesa que tras as derrotas é habitual que o plantel vexa “todo negro”, pero “ao día seguinte xa tes que estar lista para afrontar un novo reto”. A chave para saír desta dinámica é estar sempre dando o máximo, sexa a situación que sexa, porque se non, se estás psicoloxicamente mal, irá peor. Nós preferimos afrontalo da mellor maneira posible”.
As malas sensacións do campo compénsanse co desfrute nas sesións de traballo: “É verdade que o pasamos ben adestrando, con intensidade e contundencia, e con todo o que conleva un adestramento, pero intentamos pasalo o mellor posible porque ao final creo que será a diferenza de estar cos outros equipos aí abaixo, que pode pesar psicoloxicamente”, resume Iris.
