A pandemia de COVID-19 interrompeu moitas competicións. Houbo algunhas que se retomaron, outras que se deron por finalizadas e outras nas que aínda tiñan esperanzas de se celebrar. A Real Federación Galega de Fútbol ten novas con respecto á Copa de Galicia de Fútbol Sala: a competición vaise retomar así que Galicia terá campioas de Copa.
A RFGF vén de anunciar que opta por retomar o torneo do KO correspondente á pasada campaña, según informa na súa web. “O Comité Galego de Fútbol Sala da RFGF optou nas por retomar a Copa Galicia da campaña 19/20 coa disputa das dúas semifinais e das finais”, explican.
Ourense Envialia, Poio Pescamar, Burela Pescados Rubén e Viaxes Amarelle son os clubs aspirantes ao título de campioas entre os equipos femininos.
A decisión tomouse logo de realizarse xuntanzas cos clubs participantes na competición. Deste xeito, a Copa Galicia de Fútbol Sala, tanto feminina como masculina terá un desenlace non abrupto e con campioas e campións.
Semifinais o 10 de outubro
O torneo do KO encaraba a súa recta final cando a competición detívose en seco o pasado mes de marzo pola pandemia da COVID-19. Así, e para coñecer aos novos campións do título autonómico, a RFGF decidiu que se celebren as semifinais que estaban pendentes e as finais en ambas as categorías.
Na categoría feminina as semifinais serán as seguintes:
- Ourense Envialia – Poio Pescamar Sábado día 10 de outubro – 18.30 horas en Os Remedios – Ourense
- Burela Pescados Rubén – Viaxes Amarelle FSF Sábado 10 de outubro – 18.30 horas no pavillón de Vista Alegre (Burela).
Unha vez coñecidos os/as finalistas nas dúas categorías a RFGF comunicará a sede na que se disputará a gran final da Copa Galicia correspondente á pasada tempada 2019/2020.
As futbolistas do Burela, defenderán o seu título de campioas
O último título da Copa de Galicia foi para as Guerreiras Laranxas que gañaron o trofeo no Pazo Municipal dos Deportes de Riazor na Coruña. Foi a gran final da XIII Copa Galicia Feminina de futsal e o título o disputaron contra o Ourense Envialia. Daquela Julio Delgado adestraba as da Mariña e Morenín dirixía as ourensás. As laranxas impuxérasen por un marcador de 0-3.
O Parrulo, Burela, Noia e Santiago Futsal loitarán polo entorchado masculino
Na categoría masculina os horarios das semifinais serán os seguintes:
- O Parrulo Ferrol – Burela Pescados Rubén Luns día 28 de setembro – 20.15 horas na Malata (Ferrol)
- Noia Portus Apostoli – Santiago Futsal Sábado día 10 de outubro – 18.30 horas no Pavillón Municipal de Noia (Noia)
Cómpre salientar que a RFGF mantivo varios encontros cos clubs implicados para deseñar este calendario.
Mentres, a celebración Copa Galicia da tempada 2020/2021 está no aire
Se hai boas novas para a Copa Galicia da tempada 2019-20, a competición que aínda está no aire é a da presente tempada.
O Comité Galego de Fútbol Sala da RFGF anuncia que “valorará en próximas xuntanzas se finalmente se celebrará a Copa Galicia correspondente á campaña 2020/2021 dada a situación actual motivada pola COVID-19″.