Só nos últimos meses, María Filgueiras fíxose coa Copa de Galicia, a Copa de España, o Campionato de Galicia e o Campionato de España de ciclocrós. Con só 15 anos, a deportista natural de Miño é unha das grandes promesas do ciclismo galego, liderando de maneira absoluta na categoría cadete.
Aínda que admite que nun futuro lle gustaría competir en países como Bélxica ou Holanda, polo de agora esta ciclista do Meruelo segue a adestrar en Galicia da man do Caimanes Betanzos e afirma que “Galicia é unha das mellores comunidades para facer ciclocrós”. Falamos con ela en As Nosas tras a homenaxe que recibiu por parte do Concello de Miño.
As Nosas: Como viviches esta tempada chea de éxitos?
María Filgueiras: Foi unha boa tempada. Estou moi orgullosa de todo o traballo que fixen ata chegar aos campionatos e gañalos.
As Nosas: Xa no Campionato de España eras unha clara favorita. Notas máis presión nas competicións tras ter pasado por tantos podios?
María Filgueiras: Non. Saio moi animada e contenta e con ganas. Era clara favorita xa que gañara a Copa de España e o Campionato Galego e outras carreiras.
Ver esta publicación en Instagram
As Nosas: Antes de comezar no ciclocrós practicabas outros deportes?
María Filgueiras: Si. Facía tríatlon e ciclismo de estrada e montaña.
As Nosas: E como pasaches ao ciclocrós?
María Filgueiras: É unha modalidade que quería coñecer e o meu club facíaa. Apunteime a unha carreira, gustoume moito e seguín. Comencei o primeiro ano que xa puiden, que foi o ano pasado en cadetes de primeiro, con 14 anos.
As Nosas: Agora compites co Meruelo, cando entraches no club?
María Filgueiras: Nesta tempada de ciclocrós, desde setembro. Antes estaba no Caimanes Betanzos. Este ano quería centrarme máis na tempada de estrada e o Meruelo faloume porque querían que fora e fixera a tempada de estrada con eles, xa que teñen un bo equipo feminino.
As Nosas: O equipo é cántabro, pero ti adestras en Galicia?
María Filgueiras: Si. Vou algún fin de semana a Cantabria pero actualmente sigo adestrando cos Caimanes.
As Nosas: Con todas as medallas que tes, recibes máis ofertas doutros equipos?
María Filgueiras: Polo de agora non me falou ningún.
As Nosas: Qué significou para ti recibir unha homenaxe na casa, realizada polo Concello de Miño?
María Filgueiras: Estou moi contenta e moi agradecida ao Concello pola homenaxe, porque agradécense estas pequenas cousas que fan.
As Nosas: Imaxino que medrando terías referentes deportivos, cales son as deportistas ás que admiras?
María Filgueiras: Fíxome moito en Iván Feijoo, que é un ciclista galego que está no MMR e fai ciclocrós e montaña. Entre as femininas sempre seguín moito a Jolanda Neff e máis próximo está Aida Nuño, que é do meu club.
Ver esta publicación en Instagram
AN: E adoitas adestrar con Aida Nuño para aprender dela?
MF: Si, en carreira vou aos circuitos con ela. Dame consellos e anímame moito.
AN: Como ves o nivel do ciclocrós dentro de Galicia?
MF: Creo que é un das mellores comunidades para facer ciclocrós. No Campionato de España na miña categoría quedamos unha primeira e outra segunda e houbo un Team Relay o venres no que tamén gañou Galicia.
AN: Como deportistas notades apoio por parte da Federación e as institucións?
MF: A Federación axúdanos moito e apoianos moito tamén.
AN: Como compaxinas a carreira deportiva cos teus estudos? Imaxino que non é nada doado.
MF: Non, non é moi fácil, cústame moito compaxinalo. Pouco a pouco vouno intentando e pouco a pouco vouno conseguindo. Por exemplo, cando teño competicións e non podo asistir aos exames cámbianmos facilmente.
AN: De cara ao teu futuro seguirás vinculada ao ciclocrós ou ao mundo do deporte?
MF: Gustaríame estar no mundo do deporte e do ciclocrós na estrada. Nun futuro gustaríame facer INEF ou algunha carreira así que vaia co deporte.
AN: Respecto á túa carreira dentro do ciclocrós, veríasche competindo noutro país?
MF: Si, e espero poder facelo. Gustaríame ir a Bélxica ou Holanda que son os mellores países a nivel europeo no ciclocrós.
María Filgueiras: “Gustaríame ir a Bélxica ou Holanda que son os mellores países a nivel europeo no ciclocrós”
AN: Tiveches xa algunha experiencia internacional?
MF: Fun a algún campionato internacional, pero dentro de España, non fóra.
AN: Agora mesmo estás en cadete, pero cos teus éxitos pensas subir de categoría para a vindeira tempada?
MF: Si, para a próxima tempada espero estar en júnior e poder dalo todo coma sempre.
