O Club Ciclista Cambre reunirá a preto de 400 participantes no seu XIV Ciclocrós Concello de Cambre – Campionato de Galicia 2024, que se disputará o domingo, 7 de xaneiro, nas inmediacións do campo de fútbol Dani Mallo.
O Concello de Cambre acolleu, esta mañá, a presentación oficial da proba, na que estiveron presentes a concelleira de Deportes, Ana Rodríguez, o concelleiro de Desenvolvemento Socioeconómico, Diego Alcantarilla, o presidente do Club, Juan Carlos Candal, e o presidente da Federación Galega de Ciclismo, Juan Carlos Muñiz.
Desde o club apuntan que o Ciclocrós é unha das probas máis importantes do ano. Tanto é así, que dela sairán os campións galegos de cada categoría. A competición disputarase desde as 9.30 horas e, ao longo da mañá, os participantes competirán divididos nas seguintes categorías: cadete, junior, sub-23, elite, máster 30, máster 40, máster 50 e máster 60.
Carreira inclusiva en Cambre
A maiores, Cambre acollerá, por primeira vez, unha carreira de inclusión na que poderán tomar parte persoas con discapacidade física ou psíquica. En total, enfrontaranse a un percorrido duns 2,8 quilómetros e cun nivel alto de esixencia, tal e como recoñecen desde o Club Ciclista.
Nesta edición, a proba congregará a participantes procedentes de toda a xeografía galega e mesmo de fóra de Galicia. Así, haberá competidores de Asturias e de Castela e León.