A UD Granadilla Tenerife B non foi rival para un Dépor ABANCA enchufado e cun fútbol tan efectivo e resolutivo como bonito. Ao final da primeira metade as branquiazuis que adestra Irene Ferreras xa vencían por 3-0. De feito o terceiro gol foi no tempo engadido. Na segunda metade chegaría o cuarto e terceiro na conta particular de Carlota Suárez que asinaba así un hat-trick.
Fiiiiinaaaaal do #DéporABANCAUDGTenerifeB, 4-0! pic.twitter.com/j7tDL3EqMn
— RC Deportivo (@RCDeportivo) November 26, 2022
Viña o Dépor ABANCA de perder contra o Barça B e quería volver á senda dos triunfos e demostrar que, en Abegondo, non hai quen lles tusa ás branquiazuis. Así foi. O fortín abegondés mantense invicto. So un empate pon un pequeniño lunar na traxectoria das coruñesas no seu feudo.
Nesta décima xornada da Primera Federación do FutFem da RFEF as galegas recibían ao filial da UD Granadilla Tenerife. As canarias tiveron claro desde o arranque do choque que o Dépor ABANCA non llelo había poñer doado. Aos 2 minutos de xogo xa tivo que poñerse o traxe de faena a cancerbeira visitante Andrea Gurtner para impedir o primeiro das locais. O tiro foi de Ainhoa Marín. Unha xornada máis a futbolista deportivista creou perigo cada vez que tocou balón.
No minuto 5 a ocasión foi para Charle, no 7 para Cris Martínez, e no 11 o Dépor ABANCA mandou o esférico á madeira por dúas veces nunha mesma xogada, primeiro Inés Altamira e logo Eva Dios. Tanto vai o cántaro á fonte, que xa se sabe… o gol acaba por chegar. Ese tanto que abriría a lata para o equipo que prepara Irene Ferreras chegou no minuto 17 nas botas de Paula Gutiérrez.
Unha pena máxima de Andrea Gurtner que derrubaba na área a Carlota Suárez permitiu á deportivista empezar a súa particular lista de goles. Corría o minuto 28 e a deportista transformaba o penalti colocando no marcador de Abegondo o 2-0 e colocando o partido un pouco máis costa arriba para a UD Granadilla Tenerife B.
Media hora do #DéporABANCAUDGTenerifeB en #Abegondo e en 📺 https://t.co/TVumX8qPV9! pic.twitter.com/WHthKJso4Y
— RC Deportivo (@RCDeportivo) November 26, 2022
Seguiron caendo as ocasións do lado deportivista. E chegou un novo tanto xa no tempo engadido do primeiro período. De novo Carlota Suárez esta vez bombeando o balón e colándoo na portaría defendida por Andrea Gurtner. O 3-0 foi un gol psicolóxico ao fio do descanso e terminou de encamiñar o triunfo deportivista, que nesta xornada estaba desenvolvendo un bo xogo e anotando goles. Paquete completo!
Descanso do #DéporABANCAUDGTenerifeB en #Abegondo! En quince minutos continúa o partido en directo en 📺 https://t.co/BRgppx6t5m! pic.twitter.com/WUw66271IA
— RC Deportivo (@RCDeportivo) November 26, 2022
Logo do descanso, no segundo acto, o guión non mudou. O Dépor ABANCA seguiu propoñendo un xogo moi vertical e chegando con ocasións claras. Así e todo, o conxunto herculino baixou unha marcha as revolucións. Seguiu mandando, tendo o control do tempo e do esférico e chegando con claridade á portaría rival, pero co paso dos minutos as ocasións foron a menos. Máis calma sen perder o rumbo, nin a intensidade nas filas deportivistas.
Gol anulado á UD Granadilla Tenerife B
Perforou a meta de Yohana a UD Granadilla Tenerife B pero o tanto non subiu ao marcador xa que acción foi anulada pola colexiada.
A un paso do final do encontro chegaría o último tanto do partido. Carlota Suárez batía de novo á meta visitante nun man a man contra Andrea Gurtner que recibía o cuarto da mañá do Dépor ABANCA e o terceiro da deportista que asinou así un hat-trick para pechar o marcador en Abegondo no minuto 89 de partido.
A seguinte cita ligueira das galegas en Primera Federación FutFem da RFEF será o domingo 4 de decembro ás 11:00 na Ciudad Deportiva Dani Jarque ante o RCD Espanyol. As deportivistas fanse fortes na zona alta da táboa cos 20 puntos no seu haber.
FICHA TÉCNICA
4) RC DEPORTIVO ABANCA: Yohana, Cris Martínez (Lorena Reina, min. 61), Inés Altamira, Raquel García, Samara (Patri López, min. 61), Henar, Paula Gutiérrez, Ainhoa Marín (Letti, min. 75), Eva Dios (Aroa Guerra, min. 46), Charle (Sara Navarro, min. 75) e Carlota Suárez.
0) UD GRANADILLA TENERIFE B: Gurtner, Porto, Vero Herrera, Isa Álvarez, Lara Loreno (Ana Fernández, min. 46), Berta (Tati Cruz, min. 80), Encarni, Moneyba (Arminda, min. 73), Aithiara (Lara González, min. 73), Eulalia e Giovaninha (Ainhoa, min. 46).
GOLES: 1-0 Paula Gutiérrez (min. 17); 2-0 Carlota Suárez, de penalti (min. 28); 3-0 Carlota Suárez (min. 45); 4-0 Carlota Suárez (min. 89).
EQUIPO ARBITRAL: Coral Couso Cuadrado (c. catalán). Cartón amarelo a Gurtner (min. 28), Encarni (min. 69), Letti (min. 80) e Isa Álvarez (min. 90+2).
INCIDENCIAS: Partido correspondente á 10ª xornada da Primera Federación do FutFem da RFEF disputado na Cidade Deportiva de Abegondo.