- A escuadra que dirixe Ana Seabra quere trasladar as boas sensacións do pasado sábado á competición doméstica.
- Será o primeiro dos catro encontros que o Mecalia disputará en apenas dez días.
A espectacular remontada do Mecalia Atlético Guardés no partido de ida dos cuartos de final da European Cup EHF, na pista do Madeira SAD Andebol, caeu como auga de maio no vestiario. Un bálsamo necesario tras unha complicada semana. Unha inxección de moral para seguir. Non queda outra.
O deporte non espera por ninguén e o intenso mes de febreiro que acomete o conxunto miñoto obrígalle a xogar catro partidos en apenas dez días. Hoxe, mércores 15 de febreiro, renova a marcha na liga Guerreras Iberdrola cun duelo de alto nivel contra o Motive.co Gigón na Sangriña (20:30, en directo pola canle de youtube do Mecalia Atlético Guardés. Arbitrarán o partido os colexiados: Carlos Fritise e Andrés Rosendo.
A ilusión europea debe quedar aparcada ata o domingo, cando se resolve a eliminatoria de cuartos. Antes, o Inferno da Sangriña acéndese para un partido importantísimo na competición doméstica. O Mecalia Atlético Guardés necesita empezar a puntuar con asiduidade en Liga Guerreras Iberdrola. Agora mesmo ocupa a novena posición, que o levaría a disputar o play-out de permanencia a final de tempada, algo que a entidade quere evitar por todos os medios.
Un triunfo permitiría ao bloque de Ana Seabra igualar con Beti-Onak no oitavo posto, precisamente o rival que pecha este encadeado de catro encontros en dez días. Polo medio, a volta da European Cup EHF o domingo e a visita a Logroño do próximo mércores.
Pero máis aló de cábalas clasificatorias, o equipo do Baixo Miño céntrase en si mesmo. Mellorar prestacións, adquirir regular, aumentar eficacia. En definitiva, estar o máis preto posible de gañar os partidos. A cara que está a exhibir en Europa, con cinco vitorias noutros tantos partidos, é un modelo perfecto para seguir. O feito de que sete dos nove encontros que quedan por disputarse en Liga sexan na Sangriña, é un impulso importante para saír á boia.
O primeiro banzo desa escalada é o sexto clasificado da liga. O colectivo xixonés conta con 16 puntos, sete máis que o Mecalia Atlético Guardés, e está ben situado nesa zona media-alta da táboa. Tamén está inmerso nos cuartos de final da Copa Europea e, no seu caso, está obrigado a remontar cinco goles contra Elche a próxima fin de semana. Se o Mecalia Atlético Guardés logra avanzar a semifinais, medirase ao gañador desta eliminatoria.
A formación que dirixe Cristina Cabeza ten varias xogadoras diferenciais no seu bloque de xogadoras. Paula Valdivia, por exemplo, está metida de cheo na loita por ser a máxima goleadora da liga, título individual polo que tamén pelexa a xogadora do Mecalia Atlético Guardés Sandra Santiago. Ademais, a electricidade da lalinense Cecilia Cacheda no centro da primeira liña, a experiencia de Marizza Faría, que segue xogando mentres compaxina o seu cargo de seleccionadora de Paraguai, onde dirixe a Pauli Fernández, ou Carmen Arroio, un valor moi a ter en conta no futuro, pero tamén no presente.
Ana Seabra, pola súa banda, ten as baixas de Ángela Nieto e Júlia Nuez, pero o resto do bloque de xogadoras está dispoñible para o reto. Tamén Fanny Descalzo e Naza Calzado, que viviron unha nova estrea coa camiseta do Guardés o pasado domingo en Madeira, para dar o pistoletazo de saída á súa segunda etapa no club da mellor maneira posible. Tanto elas como o resto das súas compañeiras pretenden que a cousa non se free aquí. O mellor sempre está por chegar.
Ana Seabra: “O equipo está preparado para cambiar o chip mental”
A adestradora portuguesa do Mecalia Atlético Guardés, Ana Seabra, viviu con alegría o seu vitorioso debut na que foi a súa casa o pasado sábado. Pero o triunfo diante o Madeira SAD Andebol xa pertence ao pasado e o que incumbe neste momento é o importante compromiso ligueiro contra o Gijón, que será o seu primeiro partido da Liga Guerreras Iberdrola á fronte do banco miñoto. “Despois do partido de Funchal, penso que o equipo está preparado para cambiar o chip mental e saber que temos un partido moi importante”, expresa.
“Imos ir a disputalo con todo para gañar os dous puntos e estamos preparadas e motivadas para facelo”, proclamaba na previa do partido Ana Seabra, que sabe que o encontro “non vai ser fácil” pola calidade do rival. “Esperamos un partido moi intenso, con dous equipos traballando o mellor posible desde o punto de vista estratéxico para tentar gañar”, analiza.
Ana Seabra, adestardora do Atlético Guardés: “Imos ir a disputalo con todo para gañar os dous puntos e estamos preparadas e motivadas para facelo”
“Gijón ten unha primeira liña moi forte, que xera moitas dificultades. Imos ter que estar moi concentradas en defensa para facer ben o noso traballo e en ataque necesitaremos ter unha alta eficacia”, engadía a adestradora lusa Ana Seabra.