- María da Paz ‘Chuchi’ Corbalán “a pincelada mestra do CV Arenal Emevé” para pechar o bloque de xogadoras segundo apuntan desde o equipo lucense.
- A MVP 21-22 da Superliga Arxentina vivirá a súa primeira experiencia fóra do seu país.
- Pascual Saurín, técnico das loitadoras, destaca: “Encaixa perfectamente no perfil que estabamos a buscar porque é traballadora e ten ambición”.
O CV Arenal Emevé xa ten todas as pezas que necesitaba para afrontar unha ilusionante tempada na Liga Iberdrola. O club pechou o seu talentoso bloque de xogadoras “cunha pincelada mestra: María da Paz ‘Chuchi’ Corbalán”, destacan desde a entidade lucense.
A oposta arxentina de 25 anos, natural de San Miguel de Tucumán, vivirá en Lugo a súa primeira experiencia fóra do seu país de orixe.
Os números de Chuchi Corbalán na Superliga Arxentina convidan a soñar con que será unha punta de lanza certeira para superar ás defensas rivais. “O seu principal rol no equipo vai ser atacante. Encaixa perfectamente no perfil que estabamos a buscar porque é traballadora e ten ambición”, apunta o adestrador das Loitadoras, Pascual Saurín.
O actual seleccionador español considera que a Chuchi Corbalán vai atopar no Municipal as condicións perfectas para demostrar a súa valía: “É a primeira vez que vai saír de Arxentina, buscando cotas máis altas e retos importantes. Aquí vai ter un club e un equipo para que poida desenvolver o seu potencial”, apunta.
A traxectoria de Chuchi Corbalán
A tucamana comezou os seus primeiros pasos no voleibol no Club Fundarche Vóley da súa cidade natal. Sociedade Española Jujuy e Banco Provincia foron os seguintes chanzos na súa carreira antes de chegar a Boca Júniors. No mítico club bonaerense militou seis tempadas nas que logrou catro campionatos de Superliga, cun MVP incluído (tempada 21-22). Coas xeneizes tamén levantou dúas Copas Metropolitanas.
Chuchi Corbalán é tamén internacional absoluta con Arxentina e logrou os seus maiores fitos coa selección en categorías inferiores, onde foi campioa da Copa Panamericana sub18.
O bloque definitivo de xogadoras do CV Arenal Emevé estará conformado na tempada 2023-24 na Liga Iberdrola de voleibol polas seguintes 13 xogadoras logo da chegada de Chuchi Corbalán:
- Receptoras: Lucía Prol, Carolina Camino, Alejandra Pérez, Olalla González e Zoi Mavrommatis.
- Opostas: María da Paz ‘Chuchi’ Corbalán.
- Colocadoras: Patricia Aranda e Ainara Burgo.
- Centrais: Karyna Malachias, Jéssica Akamere e Mame Diouf.
- Líberos: Lida Figueira e Emma Piqueras.
