O Pescados Rubén Burela FS estrea ano con máxima esixencia no calendario e por partida dobre. As actuais campioas de Copa da Raíña e Supercopa de España dan a benvida a 2021 coa súa estrea na terceira edición copeira, mañá, 7 de xaneiro, na pista do Ence Marín Futsal (20.30 horas, A Raña), para dar paso o sábado 9 de xaneiro á defensa do título conseguido en Las Rozas en 2019, fronte o Poio Pescamar FSF (12.00 horas, Vista Alegre).
As Guerreiras Laranxas arrincan ao grande para dar continuidade ao broche perfecto de 2020. “Creo que non podiamos acabar o ano mellor. Foi un ano moi duro e para todas foi moi reconfortante finalizalo así” explicaba a meta Sandra Buzón lembrando o galardón da Raíña revalidado no mes de decembro en Málaga, seguido do peche da primeira volta reforzando o liderado do Grupo B da elite.
O Ence Marín Futsal, de Segunda, agardará as mariñás en oitavos de Copa con moitas ganas de dar a sorpresa e co pulo de impoñerse xa a un rival de Primeira: “Vai ser moi difícil; as eliminatorias a un só partido sempre o son. É un rival que chega reforzado despois de vencer en dezaseisavos a Viaxes Amarelle. Creo que van deixalo todo para acceder á fase final”, advertía a 4 laranxa, Sandra Buzón, facendo referencia á vitoria das pontevedresas nos penaltis na rolda anterior despois do empate de 3-3.
“Este é o primeiro paso que debemos superar para converter en tres o título que revalidamos hai tan só unhas semanas”, explica Sandra Buzón. “Temos moitas ganas; despois duns días de descanso, xa estamos a tope de novo cos adestramentos e con moi boas sensacións”, así de contundente se amosaba a santanderina, que defendeu a rede burelista na despedida de 2020, fronte a Intersala (6-2).
Da Copa a Supercopa
Nin máis nin menos. A Supercopa será o segundo prato da semana e co orgullo e responsabilidade do Pescados Rubén Burela de defender o galardón na Bomboneira: “Estamos non só ilusionadas senón tamén moi concienciadas en facer un bo traballo tanto na Copa coma na Supercopa, que xa nos agarda o sábado, aquí en Burela. Iso nótase e vívese nos adestramentos” confesaba Sandra Buzón.
A xogadora do Burela non agachaba a súa emoción: “Se a Copa nos pareceu impresionante, a Supercopa é mellor, sendo na casa e coa esperanza de que poida acompañarnos a nosa xente. Todo o equipo está cunhas ganas insuperables de que chegue o sábado” aseguraba a porteira ante o encontro que volverá protagonizar un derbi galego e que poderá seguirse en directo por Teledeporte.