O Viaxes Amarelle FSF viaxaba a Gran Canaria a medirse cun rival directo coa firme intención de conseguir os tres puntos necesarios, para afastarse da zona baixa da táboa da Primeira División. Obxectivo cumprido. As futbolistas que adestra Jorge Basanta asinaron un trunfo por 0-2 diante do Teldeportivo. Xogaron un partido serio, de moito traballo e con ocasións para ambas as dúas plantillas. De feito, as porteiras tiveron traballo extra nesta xornada. Os goles das coruñesas foron de Candela Soria e de Patri Corral.
O partido empezaba co Viaxes Amarelle FSF querendo levar o tempo de partido e xogar o balón. Mentres, o conxunto local optaba por unha defensa a media cancha, e tratar de roubar en primeira liña e sorprender á contra.
As ocasións máis claras no primeiros quince minutos de xogo, foron para as galegas, que se atoparon cunha boa Mariona defendendo a portaría das canarias. Pero o últimos cinco minutos parecían facerse longo para as galegas, e as canarias tiveron varias ocasións moi claras, pero unha inconmensurable Leti Rojo facía unhas paradas espectaculares que conseguían levar o partido ao tempo de descanso co 0-0 no marcador.
Xa na segunda metade do encontro, o cruce empezou co conxunto canario buscando mover máis rápido o balón e pretendendo ter máis posesión do esférico. Deste xeito, aspiraban as locais a ser quen de xerar maior perigo na portaría que defendía Leti Rojo. E o certo é que conseguiron ter maior control da pelota que na primeira metade, pero o que non acadaron foi chegada con solvencia á area coruñesa.
Enfronte, o conxunto galego non rebaixaba as súas intencións de xogar o balón e poder xerar oportunidades de gol á portaría local. Os minutos pasaban e partido seguía co 0-0 no marcador, aínda que houbo ocasións de ambos os dous equipos.
Os goles facíanse esperar, até que a tres minutos do final, Candela Soria recibía de costas á portaría e virábase e tiraba de primeiras conseguindo meter o balón ao fondo da rede e pór o 0-1. Só restaban tres minutos para a conclusión do partido e o Viaxes Amarelle adiantábase no electrónico.
Co marcador en contra, o conxunto canario optaba polo xogo de cinco e poder igualar a contenda, pero as galegas souberon reaccionar cunha boa defensa.
A sentenza foi de Patri Corral
A falta de pouco menos de dous minutos, Patri Corral roubaba un balón en cancha propia e desde algo máis de trinta metros mandaba o balón ao fondo da rede. Así, mentres o conxunto local estaba a facer o cambio de porteira – xogadora, subía o 0-2 ao marcador.
Aínda quedaba tempo por diante, e as grancanarias seguían buscando maior punch optando polo xogo de cinco. Buscaban desesperadamente o empate, pero Viaxes Amarelle FSF, moi metido no partido, estivo serio en defensa e truncou as ilusións canarias.
As coruñesas do Amarelle pechaban o encontro cun 0-2 ao seu favor e traían para A Coruña tres puntos de ouro fronte a un rival directo.
Foi un partido moi competido e serio do cadro herculino, que sabía do importante deste partido fronte a un rival directo. O conxunto que adestra Jorge Basanta víase na necesidade de conseguir puntuar e manter o golaverage con outros dos rivais directos cos que non se enfrontará na segunda fase da competición de liga, onde dez equipos loitarán pola permanencia.
O seguinte rival do Amarelle, o temible Futsi
Tras a disputa deste novo encontro da competición regular, o Viaxes Amarelle FSF segue a estar colocado na terceira posición pola cola da clasificación.
As herculinas regresarán o martes aos adestramentos. O seu seguinte reto será diante dun contrario complicado, a un rival da zona alta da clasificación da Primeira División Nacional Feminina de Fútbol Sala. O cadro herculino disputará a decimoséptima xornada do Subgrupo A, o sábado 6 de marzo de 2021 ás 18:00 horas no Pavillón Municipal de Sacra Familia (A Coruña) recibindo ao todopoderoso Futsi Atlético Navalcarnero.
FICHA TÉCNICA
GRAN CANARIA FSF TELDEPORTIVO: Mariona, Collado, Gallegos, Vanessa e Montufo – quinteto inicial -. Tamén xogaron: Idoia, Dámaso, Karla Ticona, Andrea e Gema.
VIAXES AMARELLE FSF: Leti Rojo, María Gómez, Lau Doce, Anna Escribano e Candela Soria – quinteto inicial -. Tamén xogaron: Patri Corral, Yaiza, Sofía e Cris Lourés.
GOLES: 0-1 Candela Soria (min. 37); 0-2 Patri Corral (min. 38).
ÁRBITROS: Almeida León e Santana Santana del Colegio de Árbitros de Canarias. Mesa: García Guerra del Colegio de Árbitros de Canarias. Sancións: Yaiza del Viaxes Amarelle FSF (cartón amarelo).
INCIDENCIAS: Partido correspondente áa decimosexta xornada do Subgrupo A de la Primeira División Nacional Femenina de Fútbol Sala disputado na Cidade Deportiva Gran Canaria (Las Palmas de Gran Canaria.
