A profesionalización da Primera Iberdrola xa ten data. O vindeiro 15 de xuño esta liga pasará a ser profesional, equiparándose así ao seu equivalente masculino. Ata agora, só tres competicións gozaban deste status: LaLiga Santander e LaLiga Smartbank de fútbol e a Liga Endesa de baloncesto masculino. A LF Endesa, a máxima categoría feminina de baloncesto, non verá porén ningún cambio.
O secretario de Estado para el Deporte, José Manuel Franco, anunciou a modificación na súa comparecencia na Comisión de Cultura y Deporte do Congreso de los Diputados.
Nas súas palabras, “o noso compromiso coa igualdade no ámbito deportivo vaise concretar neste fito histórico. Esperamos contar co apoio unánime de todo o estamento deportivo e político, porque avanzar en materia de igualdade é un beneficio global para a sociedade no seu conxunto, é síntoma de boa saúde democrática e de políticas públicas orientadas a crear sociedades máis libres e xustas. É un reto de todas e todos que imos liderar”.
A futura Ley del Deporte, que fará da Primera Iberdrola unha liga profesional, está “practicamente acabada” a falta só de retoques técnicos. A nova norma inclúe a definición legal do deportista, o reparto competencial, a protección da igualdade entre homes e mulleres e a loita contra a discriminación ao colectivo LGTBI.
Os obxectivos do CSD
Para os próximos meses, o Consejo Superior de Deportes ten como obxectivos avanzar en reformas pendentes, crear un novo modelo deportivo acorde ás necesidades actuais e lograr a igualdade entre homes e mulleres no deporte.
Ademais, o CSD comprométese a impulsar outras normas deportivas pendentes como a Ley de Ordenación das profesionais do deporte, e o proxecto de Ley de lucha contra el dopaje ou a regulación do Seguro Deportivo Obligatorio.
Medra o orzamento
O presuposto destinado ao Consejo Superior de Deportes para o ano 2021 ascenden a 251 millón, un 95% máis que no último ano olímpico, e un 23,5% máis nos fondos destinados ás federacións.
A cifra tamén ascende en cinco millóns a subvención ordinaria e a dotación ás comunidades elévase nun 30%, ata os 14,6 millóns. No caso do deporte feminino e inclusivo dóbrase a cantidade. “Este orzameto é o maior que se fixo desde o 1992”, declarou Franco.
No relativo aos Fondos Europeos, o secretario resaltou que España é o único país da Unión que incorporou o deporte como “elemento tractor” no plan de recuperación, a través de tres plans de inversión e reforma: dixitalización, transición ecolóxica e planl social. Para eles, o CSD disporá de máis de 300 nillóns de euros.
Na súa intervención, o secretario destacou ademais a importancia da relación entre deporte e saúde, afirmando que “cada euro invertido en actividade física evita ata 15 euros de gasto sanitario. A práctica regular de deporte é a micropílula máis eficaz para construir unha sociedade máis capaz, máis feliz e máis sostible”.
Franco apunta así mesmo que “saúde e deporte deben camiñar inexorablemente da man como eixe estratéxico das políticas públicas deportivas das próximas décadas”.
A LF Endesa seguirá sen ser profesional
Malia o indudable crecemento da LF Endesa, a categoría de ouro do baloncesto feminino español, non consta que esta competición vaia ser profesionalizada, como si o será a máxima división de fútbol e como xa é a Liga Endesa masculina.
Esta tempada, o Valencia Basket, coa galega Raquel Carrera nas súas filas, foi campión da EuroCup e na vindeira tempada competirá na seguinte categoría, a Euroliga.
Desta forma, sete equipos españoles participarán nas dúas competicións europeas, co Ensino de Lugo tendo posibilidades de participar na copa continental.
Ademais, a Selección de Baloncesto atópase preparando o EuroBasket de Valencia, e o equipo do 3×3 quedou ás portas da clasificación para os Xogos Olímpicos.
