O 3x3 de Marta Canella quédase ás portas dos Xogos Olímpicos

A Selección Española de baloncesto 3×3 quedou a piques de entrar nos Xogos Olímpicos de Toquio 2021. O combinado estatal, co que compite a galega Marta Canella, caeu eliminado no partido de repesca ante Xapón, por un axustado 18-20.

O equipo dirixido por Anna Junyer foi eliminado na semifinal do Preolímpico de Graz polos Estados Unidos, por un 21-13, o que levou a Canella e ás súas compañeiras á repesca, co terceiro billete para Toquio en xogo. Neste encontro vencerían as niponas, acadando a última oportunidade de competir no evento do verán.

A traxectoria de Canella e a Selección no Preolímpico de Graz

O conxunto da Selección Española finaliza así un gran torneo, no que partía como o 13º favorito. Na primeira fase, as españolas venceron a Italia, Suiza, China Taipei e Austria accedendo ás semifinais triunfando tamén sobre Australia por un 14-12.

Marta Canella e as demais xogadoras pasaron así á semifinal, onde agardaba Estados Unidos, claramente superior sobre a pista vencendo o pase á final e o billete olímpico.

Con EUA e Francia na final, dúas das tres clasificacións en xogo estaban decididas. Só quedaba un terceiro pase, que se decidiría entre España e Xapón.

Marta Canella ante Xapón na repesca do Preolímpico do 3x3 con España / FIBA — Marta Canella ante Xapón na repesca do Preolímpico do 3×3 con España / FIBA

No último duelo, con moito en xogo, as xogadoras dirixidas por Junyer competían contra o sexto cabeza de serie. Malia a súa superioridade previa, as españolas foron quen de aguantar o ritmo ata o último segundo, obrigando a Xapón a remontar a tempo para forzar unha prórroga.

A igualdade foi máxima na pista austríaca e o partido só se puido decidir cunha canastra de Stephanie Mawuli, dando o pase ás xaponesas.

Podes revivir aquí o duelo entre España e Xapón do Preolímpico de Graz:

O presidente da FEB mostra o seu orgullo pola Selección 3×3

“Temos que sentirnos orgullosos desta Selección porque nos fixo vibrar e estivo moi preto do obxectivo. Seguro que nun futuro inmediato chegarán os éxitos que merecen”, declaraba Jorge Garbajosa, presidente da FEB, tras a eliminación do combinado estatal.

Jorge Garbajosa (presidente da FEB): “Temos que sentirnos orgullosos desta Selección porque nos fixo vibrar e estivo moi preto do obxectivo”

O dirixente quixo destacar “a calidade e o esforzo das nosas xogadoras e técnicos, clasificarse para Toquio tería sido marabilloso, pero sabiamos todos que era moi difícil nun torneo Preolímpico con rivais tan cualificados. Estiveron moi preto, e por iso merecen a nosa felicitación. O seu traballo nestes últimos meses tan complicados foi exemplar”.

Nesta liña, Garbajosa remarcou o “espírito e valores” de Marta Canella, Vega Gimeno, Aitana Cuevas e Sandra Ygueravide, que permiten á todas as seleccións de España “liderar os ránkings mundiais en todas as categorías. Estou convencido de que tamén pronto o imos facer no 3×3”.

A isto engadiu que “para a FEB, o baloncesto feminino e o baloncesto 3×3 son dous piares estratéxicos, nos que nestes últimos anos invertimos e seguiremos invertindo recursos, esforzos e sobre todo ilusión, porque van ser dúas áreas claves no crecemento do baloncesto español a todos os niveis”.