Despois de oito xornadas disputadas no grupo 1 da Primera Nacional, tres equipos galegos mantéñense á fronte da clasificación. Viajes Interrías, Sárdoma CF e PM Friol encabezan o grupo, con 22, 18 e 17 puntos respectivamente.
No grupo medio, hai outros catro galegos, co Umia CF na quinta posición sumando 13 puntos, o Victoria CF como sétimo con 12 puntos, o Dépor ABANCA B, oitavo con 11 puntos e a UD Mos novena, tamén con 11 puntos. Xa en postos de descenso, o Victoria FC e o SD Villestro ocupan as prazas dos equipos que perderán a categoría.
O Viajes Interrías suma unha xornada máis puntuando gañando ao Victoria FC
Na fin de semana, o líder deste grupo da Primera Nacional non perdoou e sumou a que xa é a súa sétima vitoria consecutiva, desta vez precisamente ante o Victoria FC. O equipo adestrado por Luis Treviño confirma o seu gran estado de forma superando ás compostelás por un 1-3 final.
O Interrías adiantaríase xa na primeira parte cun tanto de Nati, unha das máximas anotadoras da competición. A futbolistas seguiu sendo protagonista en ataque, ante un Victoria que confiaba en Laura Lorenzo e acadou o empate no inicio da segunda parte.
Porén, as visitantes reaccionaron cun segundo gol de Nati e sentenciaron o encontro cun tanto de Cata nun remate de cabeza.
Con este resultado, o Interrías segue aumentando o seu colchón de puntos fronte ao resto de equipos, e o Victoria FC suma unha nova derrota, aínda que pode presumir de terlle anotado a un equipo que mantivo a portería a cero durante seis xornadas.
Luis Treviño: “A experiencia dinos que ata o final temos que apretar”
O Sárdoma golea ao SD Villestro
Na oitava xornada, o segundo clasificado recibía ao colista, e celebrou cunha goleada a súa centésima vitoria na Primera Nacional. O Sárdoma non fallou ante o Villestro e cun 4-1 sumou outros tres puntos para afianzarse na zona superior da táboa clasificatoria.
Neste duelo, as locais non necesitaron máis de 16 minutos para encamiñar o encontro. No primeiro cuarto de hora Ainara e Noelia encargáronse de poñer o 2-0 no marcador, superando con facilidade ao Villestro.
Na segunda metade a historia non cambiou, cun equipo local sen opcións, rendido ante o Sárdoma, que aumentou a súa renda cun gol de Laura Izard no minuto 62 e outro de Irene no 86. O gol da honra para as visitantes chegaría ao fío do final, cun tanto de Aurora no 89.
Desde o seu debut na Primera Nacional, no 2012, o Sárdoma suma xa cen vitorias nesta división.
O Friol vence ao Dépor ABANCA B
Co factor campo a favor, o PM Friol superou ao filial do Dépor ABANCA na fin de semana, vencendo no partido cun 4-2.
As xogadoras da Reigosa necesitarían 17 minutos para abrir o marcador, pero co gol de Nazaret Ravelo, as lucenses aumentaron o ritmo de xogo. Cunha presión alta, o Friol foi quen de poñer en apuros á defensa deportivista, que cometería un erro que resultaría nun gol en propia porta de Paula Novo.
Antes do descanso, as branquiazuis loitaron pola remontada cun gol de Paula Monteagudo, deixando o 2-1 para a pausa. Tras a reanudación, a tensión no terreo de xogo aumentaba. O dominio seguiu sendo local, pero o marcador non se movería ata o minuto 75, cando un novo erro defensivo das visitantes provocou o gol en propia porta de Andrea Ansede.
Cun 3-1 en contra, o Dépor ABANCA B apretou para contrarrestar o resultado e logrou subir un tanto máis ao marcador grazas a Noela Sánchez. Porén, o Friol sentenciaría o encontro no 87, cun gol obra de Oliva León.
O Umia suma tres puntos vencendo ao Victoria CF
Na Coruña, o Umia visitaba ás cebras do Victoria CF nun duelo directo entre dous equipos que ocupan a zona morna da Primera Nacional. Antes deste duelo, as herculinas ocupaban a quinta posición, dous por riba do Umia, pero tras a vitoria visitante as posicións invertíronse.
No partido, as de Barrantes adiantáronse no marcador cun gol de Eva López no minuto 16. A futbolista foi protagonista nos ataques visitantes, ante un equipo de Cris Oreiro que non remataba de arrincar.
A igualdade no campo era patente, e reflectiuse no marcador no minuto 59, cun gol local obra de Blanca García. Porén, no tramo final do encontro de novo unha gran Eva López anotou para o Umia, co que sería o 1-2 final e afianzándose como a máxima goleadora do grupo.
Táboas no duelo entre a UD Mos e o Olímpico de León
Nesta xornada de Primera Nacional, a UD Mos foi o único equipo galego en xogar con outro de fóra, o Olímpico de León, un rival da zona alta que segue de preto ao podio de galegas. Cun 1-1 final, as pontevedresas plantáronlle cara ás leonesas e salvaron un punto en casa.
O primeiro gol do partido chegou da man de Beatriz Fernández para o Olímpico de León, nun penalti que non fallou ante Lucía Ameal. Nos minutos seguintes, as galegas loitaron por empatar o resultado, repoñéndose dos erros defensivos iniciais.
Antes do descanso, Lidia Varela poñía o 1-1, marcador que se mantivo conxelado ao longo da segunda parte, para un reparto de puntos nas Baloutas.
