- “Despois do tropezón que tivemos co Dépor na primeira xornada, van saíndo as cousiñas que tiñamos planificadas”
- “Seguimos practicamente co once do ano pasado, pero como é tradición aquí practicamente todos os anos medio plantel é novo”
- “Creo que este ano a liga ten un nivel moi alto”
Despois de disputar xa un cuarto da primeira fase da competición, o Viajes Interrías reina en solitario no grupo 1 da Primera División Nacional. O equipo dirixido por Luis Treviño mantense invicto despois de seis xornadas, nas que en cinco delas logrou manter a súa portería a cero.
–As Nosas: Levamos xa un cuarto da primeira fase da competición e sodes líderes invictas. Como o levades?
-Luis Treviño: Estamos ben, contentas no sentido de que despois do tropezón que tivemos co Dépor na primeira xornada, van saíndo as cousiñas que tiñamos planificadas. Pero isto está comezando e a nosa experiencia xa nos di que ata o final temos que apretar moitísimo porque levamos dous anos quedando na ribeira e este ano hai que intentalo novamente pero con éxito.
A verdade é que estas últimas semanas enfrontábamosnos a equipos que tiñan a mesma situación, que viñan de non perder ningún encontro como era o Oviedo e o Friol e nos dous encontros as xogadoras deron boa conta. Xunto co Olímpico de León creo que somo as únicas que contan todos os partidos con puntuación.
-As Nosas: Falas agora do Friol, outro equipo galego que se mantén no alto, pero que caeu derrotado ante vós. Como de importante foi ese partido?
–Luis Treviño: Xa tiveramos ocasión de xogar contra elas en pretempada e puidemos ver o seu nivel. Sabiamos que era un equipo que con balón é moi moi intenso, é capaz de someter aos conxuntos contrarios. Tiñamos claro que chegaba a San Pedro un equipo cun potencial ofensivo brutal, que era o que viña demostrando que era o máximo artilleiro da categoría e tamén un equipo ao que se lle facía poucas ocaisóns de gol.
Treviño: “O Friol creo que é un equipo impresionante”
Na primeira parte fumos capaces de que non fixeran gol e logo na segunda parte intentamos facer algunha para levar o partido e conseguimolo. O Friol creo que é un equipo impresionante, cun plantel xove pero moi bo, e a medida que vaian entendéndose entre elas, porque é un plantel novo, teño por seguro de que dos primeiros postos non vai baixar nunca.
-As Nosas: Respecto ao voso plantel, contades con moitas novidades en comparación coa pasada campaña?
-Luis Treviño: Seguimos practicamente co once do ano pasado, pero como é tradición aquí practicamente todos os anos medio plantel é novo. Este ano reforzamos con xente que estivo aquí noutras ocasións, como as portuguesas Gomes, Machado e Morais, que estiveron nunha anterior etapa.
Treviño: “Seguimos practicamente co once do ano pasado, pero como é tradición aquí practicamente todos os anos medio plantel é novo”
Tamén apostamos por xente xoven, como Andrea Villadeamigo, ou Sara García, que é xente de aquí e cun perfil moi bo. e logo reforzamos a portería cunha porteira máis que é Paula. Agora son 20 xogadoras e creo que o nivel mellora en garantías ao do ano pasado.
-As Nosas: No apartado defensivos estades imparables. Levades cinco xornadas de seis coa porta a cero.
-Luis Treviño: Si. Exceptuando o partido co Dépor B que foi empate a dous, logramos manter a portería a cero nos demais encontros. Creo que as xogadoras fan un traballo incomiable para intentar filtrar a maior parte das ocasións posibles e despois está refrendado pola boa actuación das porteiras. Basamos o noso potencial a partir de aí.
Treviño: “Creo que as xogadoras fan un traballo incomiable para intentar filtrar a maior parte das ocasións posibles e despois está refrendado pola boa actuación das porteiras”
-AN: E cales consideras que son as rivais máis fortes da categoría?
-LT: Creo que este ano a liga tivo un nivel moi alto. Friol vai estar aí, Sárdoma vai ser un equipo que estea aí, o ano pasado estivo neses postos, o Olímpico segue invicto…
E logo ao mellor equipos que estean loitando ata o final non van ser tantos, pero é certo que vexo unha liga onde creo que exceptuando o Villestro, os demais equipos son moi perigosos todos. Agora mesmo estamos vendo que o Victoria de Santiago está cun punto no penúltimo posto, pero pódelle competir a calquera equipo da categoría. Creo que este ano máis que nunca o grupo primeiro é un grupo impresionante.
-AN: O nivel aumenta ano a ano?
-LT: Si. Creo que si porque así como antes tachábannos de que eramos un equipo que fichabamos a moita xente e non mirabamos tanto pola xente de aquí, que nada máis lonxe da realidade, a dificultade que temos nós é ter xente de aquí por onde estamos situadas xeográficamente.
Treviño: “Agora ves os planteis e todos os equipos fixeron grandes reforzos”
Este ano practicamente todos os equipos ficharon xente de fóra da Comunidade, xente que estaba en Reto o ano pasado e baixaron de categoría polo proxecto ou por estudos ou o que sexa e recalaron nos equipos de aquí. Agora ves os planteis e todos os equipos fixeron grandes reforzos.
-AN: E para esta fin de semana, como ves o partido ante o Gijón FF?
-LT: É un rival moi complicado, que nos deu a lata a tempada pasada. Ao mellor a derrota en Gijón foi o que nos fixo logo non xogar o playoff, non depender de nós para poder xogalo. O equipo vén nunha situación complicada, porque está nos postos de abaixo e vén de cambiar de adestrador a semana pasada, pero tamén de fichar xente.
Treviño: “Creo que é o partido máis complicado que imos xogar”
Moitas incógnitas, ao que lle sumamos que a climatoloxía non vai axudar a ningún dos dous equipos a xogar o que queremos, así que a priori creo que é o partido máis complicado que imos xogar nestas semanas. Veremos como se nos da pero intentaremos seguir nesta situación.
